തിരുവനന്തപുരം: മാസ്‌കും സാനിറ്റൈസറും നിര്‍മിച്ച് നല്‍കിയതിന് പിന്നാലെ ഡോക്ടര്‍മാര്‍ക്ക് ആവശ്യമുള്ള ഗൗണുകളും ഒരുങ്ങുകയാണ് ജയിലില്‍. പൂജപ്പുര സെന്‍ട്രല്‍ ജയിലിലെ തടവുകാരാണ് ശ്രീചിത്ര മെഡിക്കല്‍ ഇന്‍സ്റ്റിറ്റ്യൂട്ടിലേക്ക് വേണ്ട ഗൗണുകള്‍ നിര്‍മിക്കുന്നത്. ഇന്‍സ്റ്റിറ്റ്യൂട്ടിന്റെ ആവശ്യ പ്രകാരം ഒന്നാം ഘട്ടത്തില്‍ അഞ്ഞൂറ് ഗൗണുകളാണ് നിര്‍മിക്കുന്നത്. ജയിലിന് വെളിയിലോ ആശുപത്രികളിലോ സമൂഹ അടുക്കളകളിലോ ചെന്ന് കൊവിഡ് പ്രതിരോധ പ്രവര്‍ത്തനങ്ങളില്‍ പങ്കാളിയാകാന്‍ തടവുകാര്‍ക്ക് സാധ്യമല്ലെങ്കിലും കേരളത്തില്‍ രോഗവ്യാപനത്തിന്റെ തുടക്കം മുതല്‍ ജയിലറകള്‍ പ്രതിരോധ സംവിധാനം ശക്തിപ്പെടുത്തുന്നതില്‍ ഇടപെടുന്നുണ്ട്. മാസ്‌ക് നിര്‍മാണമായിരുന്നു ജയിലുകള്‍ ആദ്യം ഏറ്റെടുത്ത ദൗത്യം. ആവശ്യകതയനുസരിച്ച് പിന്നീടത് സാനിറ്റൈസറിലേക്ക് കടന്നു. ഇപ്പോഴത് ഡോക്ടര്‍മാര്‍ക്കും നഴ്‌സുമാര്‍ക്കുമുള്ള ഗൗണുകള്‍ തയ്ക്കുന്നതിലേക്കും എത്തിയിരിക്കുകയാണ്.
നേരത്തേ ഒരു ലക്ഷം മാസ്‌കുകളും രണ്ടായിരം ലിറ്റര്‍ സാനിറ്റൈസറും പൂജപ്പുര ജയിലില്‍ നിന്ന് നിര്‍മിച്ച് നല്‍കിയിരുന്നു. ഗൗണ്‍ നിര്‍മാണത്തിനിടയിലും ഇതിന് മുടക്കം വരുത്തുന്നില്ല.
ജയില്‍ വകുപ്പിനെ മാതൃകയാക്കി പൊലിസും മാസ്‌കുകള്‍ നിര്‍മിക്കാന്‍ തീരുമാനിച്ചിട്ടുണ്ട്. ഡ്യൂട്ടിയിലുള്ള പൊലിസുകാര്‍ക്ക് പുറമേ പൊതുജനങ്ങള്‍ക്കും നല്‍കാനാണ് പൊലിസിന്റെ മാസ്‌ക് നിര്‍മാണം.