മഞ്ചേശ്വരം (കാസര്‍കോട്): കര്‍ണാടക അതിര്‍ത്തിയടച്ചതിനാല്‍ വിദഗ്ധ ചികിത്സ കിട്ടാതെ കാസര്‍കോട്ട് രണ്ടു പേര്‍ കൂടി മരിച്ചു. മഞ്ചേശ്വരം ഹൊസങ്കടിക്കു സമീപം കടമ്പാറിലെ കമല (71), പൈവളിഗെ ബായിക്കട്ട അമ്പിക്കാനയിലെ രാഘവ (70) എന്നിവരാണ് മരിച്ചത്. മംഗളൂരുവിലെ ആശുപത്രിയിലേക്കുള്ള യാത്ര തലപ്പാടി അതിര്‍ത്തിയില്‍ കര്‍ണാടക പൊലിസ് തടഞ്ഞു തിരിച്ചയച്ചതിനെ തുടര്‍ന്നാണ് ഇരുവരും വിദഗ്ധ ചികിത്സ കിട്ടാതെ മരിച്ചത്. കമലയെ ഉപ്പളയിലെ സ്വകാര്യ ആശുപത്രില്‍ പ്രവേശിപ്പിച്ചുവെങ്കിലും ജീവന്‍ രക്ഷിക്കാനായില്ല. കര്‍ഷകനായ രാഘവ ഏറെ കാലമായി മംഗളൂരുവിലെ ഒരു മെഡിക്കല്‍ കോളജില്‍ വാതസംബന്ധമായ അസുഖത്തിന് ചികിത്സയിലായിരുന്നു. കഴിഞ്ഞ ദിവസം ആരോഗ്യ സ്ഥിതി അതീവ ഗുരുതരമായിട്ടും മംഗളൂരുവിലേക്ക് കൊണ്ടുപോകാന്‍ അതിര്‍ത്തി കടക്കാന്‍ കര്‍ണാടക പൊലിസ് അനുവദിച്ചില്ല. തുടര്‍ന്ന് പരിയാരം മെഡിക്കല്‍ കോളജിലേക്ക് മാറ്റിയെങ്കിലും മരിക്കുകയായിരുന്നു. ഇതോടെ കൊവിഡ് പ്രതിരോധ നിയന്ത്രണത്തിന്റെ ഭാഗമായി ജില്ലയില്‍ വിദഗ്ധ ചികിത്സ കിട്ടാതെ മരിച്ചവരുടെ എണ്ണം 12 ആയി.
കേരളത്തില്‍ നിന്ന് രോഗികളുമായി വരുന്നവരെ തലപ്പാടിയില്‍ കൊവിഡ് പരിശോധന നടത്തി. അതിര്‍ത്തി കടത്തി വിടാനുള്ള തീരുമാനമായെന്ന് മുഖ്യമന്ത്രി കഴിഞ്ഞ ദിവസം വാര്‍ത്താസമ്മേളനത്തില്‍ വ്യക്തമാക്കിയിരുന്നുവെങ്കിലും ഇത്തരത്തില്‍ യാതൊരു അറിയിപ്പും ഇന്നലെയും കര്‍ണാടക സര്‍ക്കാരിന്റെ ഭാഗത്തുനിന്നും കിട്ടിയില്ലെന്നാണ് പൊലിസ് പറയുന്നത്.