മലപ്പുറം: തെരഞ്ഞെടുപ്പ് കമ്മിഷന്റെ നിര്‍ദേശങ്ങള്‍ ലംഘിച്ചെന്നു ചൂണ്ടിക്കാട്ടി സ്ഥാനാര്‍ഥികള്‍ക്കു കമ്മിഷന്റെ നോട്ടീസ്. മുന്‍കൂര്‍ അനുമതിയില്ലാതെ ഇലക്‌ട്രോണിക് മാധ്യമങ്ങളില്‍ തെരഞ്ഞെടുപ്പ് പ്രചാരണ പോസ്റ്റുകള്‍, വീഡിയോകള്‍ എന്നിവ നല്‍കിയതിനാണ് വരണാധികാരികൂടിയായ ജില്ലാ കലക്ടര്‍ അമിത് മീണ സ്ഥാനാര്‍ഥികള്‍ക്ക് നോട്ടീസ് നല്‍കിയത്.
സ്ഥാനാര്‍ഥികളായ പി.കെ കുഞ്ഞാലിക്കുട്ടി, എം.ബി ഫൈസല്‍, ശ്രീപ്രകാശ്, ഇവരുടെ ഇലക്ഷന്‍ ഏജന്റുമാര്‍ എന്നിവര്‍ക്കാണ് നിയമനടപടി സ്വീകരിക്കാതിരിക്കാന്‍ കാരണമുണ്ടെങ്കില്‍ രണ്ടു ദിവസത്തിനകം മറുപടി നല്‍കാനാണ് നിര്‍ദേശം. ടി.വി ചാനലുകള്‍, കേബിള്‍ നെറ്റ്‌വര്‍ക്കുകള്‍, റേഡിയോ, പ്രൈവറ്റ് എഫ്.എം ചാനലുകള്‍, സിനിമാ ഹാളുകള്‍, ഇന്റര്‍നെറ്റ് അധിഷ്ഠിത വെബ്‌സൈറ്റുകള്‍, സാമൂഹിക മാധ്യമങ്ങള്‍, പൊതുസ്ഥലങ്ങളിലെ ഓഡിയോ-വിഷ്വല്‍ ഡിസ്‌പ്ലേകള്‍ എന്നിവിടങ്ങളില്‍ രാഷ്ട്രീയ സ്വഭാവത്തിലുള്ള പരസ്യങ്ങള്‍ നല്‍കുന്നതിനും ബള്‍ക്ക് എസ്.എം.എസുകള്‍, വോയ്‌സ് മെസേജുകള്‍ എന്നിവയ്ക്കും എം.സി.എം.സിയുടെ മുന്‍കൂര്‍ അനുമതി വാങ്ങേണ്ടതുണ്ട്.