മുംബൈ: ഇന്ത്യയില്‍ കൊവിഡിന്റെ സാമൂഹിക വ്യാപനം തുടങ്ങിയെന്നു ചില വിദഗ്ധര്‍ നിരീക്ഷിച്ചതിനു പിന്നാലെ, രാജ്യത്ത് കൊവിഡ് കേസുകള്‍ റിപ്പോര്‍ട്ട് ചെയ്യുന്നതില്‍ ദിവസംതോറും വലിയ വര്‍ധനവുണ്ടെന്നു ചൂണ്ടിക്കാണിക്കുന്ന റിപ്പോര്‍ട്ടും പുറത്ത്. രാജ്യത്തെ കൊവിഡ് കേസുകള്‍ നിലവിലെ രീതിയില്‍ വര്‍ധിക്കുകയാണെങ്കില്‍ ലോക്ക്ഡൗണ്‍ അവസാനിക്കുന്ന 14ന് പതിനേഴായിരത്തിലേറെ പേര്‍ക്കെങ്കിലും രാജ്യത്ത് കൊവിഡ് സ്ഥിരീകരിച്ചിരിക്കുമെന്നാണ് റിപ്പോര്‍ട്ടുകള്‍ ചൂണ്ടിക്കാണിക്കുന്നത്.
എട്ടു ദിവസം കൂടുമ്പോഴായിരുന്നു നേരത്തെ രാജ്യത്തെ കൊവിഡ് റിപ്പോര്‍ട്ട് ചെയ്ത കേസുകള്‍ ഇരട്ടിയായിരുന്നത്. എന്നാല്‍, നിലവില്‍ നാലു ദിവസം കൂടുമ്പോള്‍ കേസുകള്‍ മുന്‍പത്തേതിന്റെ ഇരട്ടിയാകുന്നുണ്ടെന്നും അതിവേഗം കൊവിഡ് വ്യാപിക്കുന്നുവെന്നതിന്റെ സൂചനയാണിതെന്നും വിദഗ്ധര്‍ ചൂണ്ടിക്കാണിക്കുന്നു. ആരോഗ്യമന്ത്രാലയം പുറത്തുവിട്ട കണക്കുപ്രകാരം മാര്‍ച്ച് 15 മുതല്‍ 20വരെയുള്ള ദിവസങ്ങളില്‍ അഞ്ചു ദിവസം കൂടുമ്പോഴാണ് കേസുകള്‍ ഇരട്ടിയായിരുന്നത്. എന്നാല്‍, മാര്‍ച്ച് 20 മുതല്‍ 23വരെയുള്ള കാലയളവില്‍ ഈ ദൈര്‍ഘ്യം മൂന്നു ദിവസമായി കുറഞ്ഞു. മാര്‍ച്ച് 23 മുതല്‍ 29 വരെ കേസുകളുടെ എണ്ണം താരതമ്യേന കുറഞ്ഞപ്പോള്‍ ആറു ദിവസം കൂടുമ്പോഴാണ് കേസുകള്‍ ഇരട്ടിയായത്. എന്നാല്‍, മാര്‍ച്ച് 29 മുതല്‍ ഏപ്രില്‍ ആറുവരെയുള്ള ദിവസങ്ങളില്‍ ഓരോ നാലു ദിവസം കൂടുമ്പോഴും ഇരട്ടി കേസുകളാണ് റിപ്പോര്‍ട്ട് ചെയ്തത്.
എന്നാല്‍, ഡല്‍ഹി നിസാമുദ്ദീനിലെ ചടങ്ങില്‍ പങ്കെടുത്ത പലര്‍ക്കും രോഗം സ്ഥിരീകരിച്ചതാണ് ഈ ഉയര്‍ച്ചയ്ക്കു കാരണമെന്നാണ് സര്‍ക്കാര്‍ വ്യക്തമാക്കുന്നത്. ഇന്ത്യയിലെ ആകെ കേസുകളില്‍ മൂന്നിലൊരു ഭാഗവും ഈ പരിപാടിയുമായി ബന്ധപ്പെട്ട് ഉണ്ടായതാണെന്നും സര്‍ക്കാര്‍ ഉദ്യോഗസ്ഥര്‍ പറയുന്നു.