റിയാദ്: സഊദിയിൽ കൊവിഡ്-19 വൈറസ് ബാധിതരുടെ എണ്ണം 2932 ആയി ഉയർന്നു. ഏറ്റവും ഒടുവിൽ ബുധനാഴ്ച്ച 137 പുതിയ വൈറസ് ബാധ കൂടി സ്ഥിരീകരിച്ചതോടെയാണിത്. നിലവിൽ രാജ്യത്ത് 2260 വൈറസ് ബാധിതരാണ് ചികിത്സയിൽ കഴിയുന്നതെന്ന് സഊദി മന്ത്രാലയം അറിയിച്ചു. 631 പേർ രോഗത്തിൽ നിന്നും മോചനം നേടിയതായും സഊദി ആരോഗ്യ മന്ത്രാലയം വ്യക്തമാക്കി. ബുധനാഴ്ച്ച 16 പേരാണ് രോഗത്തിൽ നിന്നും മുക്തി നേടിയത്. അതേസമയം, ബുധനാഴ്ച്ച രാജ്യത്ത് പുതിയ മരണം റിപ്പോർട്ട് ചെയ്‌തിട്ടില്ലെന്ന ആശ്വാസം കൂടിയുണ്ട്. നിലവിൽ രാജ്യത്തെ വൈറസ് ബാധ മരണം 41 ആണ്.

     കഴിഞ്ഞ ഏതാനും ദിവസങ്ങളായി നാലും അഞ്ചും മരണങ്ങൾ റിപ്പോർട്ട് ചെയ്‌തിരുന്നുവെങ്കിൽ ബുധനാഴ്ച്ച മരണം റിപ്പോർട്ട് ചെയ്‌തിട്ടില്ലെന്ന ആശ്വാസത്തിലാണ് രാജ്യം. ഇന്ന് മദീനയില്‍ 41, റിയാദില്‍ 37, മക്കയില്‍ 19, ജിദ്ദ 8, ദമ്മാം 6, ഖതീഫ് 5 എന്നിങ്ങിനെയാണ് പ്രധാന നഗരങ്ങളിൽ സ്ഥിരീകരിക്കപ്പെട്ട രോഗ ബാധിതർ. നിലവിൽ ഏറ്റവും കൂടുതൽ വൈറസ് ബാധിതർ തലസ്ഥാന നഗരിയായ റിയാദിലാണ്. ഇവിടെ 878 രോഗം റിപ്പോർട്ട് ചെയ്‌തുവെങ്കിലും നിലവിൽ 641 പേരാണ് ചികിത്സയിൽ കഴിയുന്നത്. 234 പേർ രോഗ മുക്തി നേടുകയും 3 പേർ മരണപ്പെടുകയും ചെയ്‌തു.

      മക്കയിൽ 551 പേർക്ക് വൈറസ് ബാധ സ്ഥിരീകരിച്ചുവെങ്കിലും 431 പേരാണ് ചികിത്സയിൽ കഴിയുന്നത്. 114 പേർ രോഗ മുക്തി നേടുകയും 08 പേർ മരണപ്പെടുകയും ചെയ്‌തു. ജിദ്ദയിൽ 432 പേരിൽ അസുഖം സ്ഥിരീകരിച്ചുവെങ്കിലും നിലവിൽ 301 പേരാണ് ചികിത്സയിൽ കഴിയുന്നത്. 125 പേർ രോഗ മുക്തി നേടുകയും 06 പെർ മരണപ്പെടുകയും ചെയ്‌തു. മദീനയിൽ 331 പേർക്ക് രോഗം സ്ഥിരീകരിച്ചുവെങ്കിലും നിലവിൽ 308 പേരാണ് ചികിത്സയിൽ കഴിയുന്നത്. 04 പേർ രോഗ മുക്തി നേടിയപ്പോൾ 19 പേരാണ് ഇവിടെ മരണത്തിനു കീഴടങ്ങിയത്.