ആലക്കോട്: ചരക്കുലോറി നിയന്ത്രണം വിട്ടു മറിഞ്ഞു ഡ്രൈവര്‍ക്ക് ഗുരുതര പരിക്ക്. മംഗളൂരു സ്വദേശി അണ്ണാ ദുരൈ(48)ക്കാണ് പരുക്കേറ്റത്. തളിപ്പറമ്പ്-കൂര്‍ഗ് ബോര്‍ഡര്‍ റോഡില്‍ കരുണാപുരം ഇറക്കത്തില്‍ ഇന്നലെ രാവിലെയായിരുന്നു അപകടം. മംഗളൂരുവില്‍ നിന്നു മര ഉരുപ്പടികളുമായി വായാട്ടുപറമ്പിലേക്ക് വരികയായിരുന്നു ലോറി. ബ്രേക്ക് നഷ്ടപ്പെട്ട ലോറി വൈദ്യുതി തൂണില്‍ ഇടിച്ചു മറിയുകയായിരുന്നു. തളിപ്പറമ്പില്‍ നിന്ന് ഫയര്‍ഫോഴ്‌സ് എത്തിയാണ് കാബിനുള്ളില്‍ കുടുങ്ങിയ ഡ്രൈവറെ പുറത്തെടുത്തത്. ഇയാളെ പരിയാരം മെഡിക്കല്‍ കോളജില്‍ പ്രവേശിപ്പിച്ചു.