റിയാദ്: സഊദിയില്‍ ഉംറ തീര്‍ഥാടകര്‍ സഞ്ചരിച്ച ബസ് അപകടത്തില്‍ പെട്ട് സ്ത്രീകളും കുട്ടികളുമുള്‍പ്പെടെ 10 പേര്‍ മരിച്ചു. മക്കയ്ക്കു സമീപം ത്വാഇഫിനും അഫീഫിനുമിടയിലാണ് അപകടം. 45 ഓളം പേര്‍ക്ക് പരുക്കേറ്റു. അറബ് വംശജര്‍ സഞ്ചരിച്ച വാഹനമായതിനാല്‍ മരണപ്പെട്ടവരിലും അപകടം പറ്റിയവരിലും ഇവര്‍ തന്നെയാണുള്ളത്. 

റിയാദില്‍ നിന്നുവന്ന സംഘം ഉംറ ശേഷം മക്കയില്‍ നിന്നുതിരിച്ചു പോകുമ്പോള്‍ ശനിയാഴ്ച വൈകുന്നേരം അഞ്ചു മണിയോടെയാണ് അഫീഫില്‍ നിന്ന് 19 കിലോമീറ്റര്‍ അകലെ ബസ് നിയന്ത്രണം വിട്ടുമറിഞ്ഞത്. അപകടവിവരം അറിഞ്ഞ ഉടനെ മക്ക റോഡ്, അല്‍ബാഹ മേഖല എന്നിവിടങ്ങളില്‍ നിന്നുള്ള ആംബുലന്‍സുകളുടെ സഹായം തേടിയതായി ത്വാഇഫ് റെഡ് ക്രസന്റ് വക്താവ് ശാദി ബിന്‍ആബിദ് അല്‍സുബൈത്തി പറഞ്ഞു.
ആരോഗ്യവകുപ്പിന്റെ ഏഴ് യൂനിറ്റുകളുമുണ്ടായിരുന്നു. പരുക്കേറ്റ 27 പേരെ ആശുപത്രിയില്‍ പ്രവേശിപ്പിച്ചിട്ടുണ്ട്. ചിലരുടെ പരുക്ക് ഗുരുതരമാണ്. അപകടത്തെ തുടര്‍ന്ന് ബസ് പൂര്‍ണമായും തകര്‍ന്ന നിലയിലാണ്.