ബംഗളൂരു: ഭരണഘടനയും ജനാധിപത്യവും സംരക്ഷിക്കാന്‍ ത്യാഗം ചെയ്യല്‍ അനിവാര്യമാണെന്ന് മുതിര്‍ന്ന കോണ്‍ഗ്രസ് നേതാവ് മല്ലികാര്‍ജുന്‍ ഖാര്‍ഗെ. സംസ്ഥാനത്തെ വകുപ്പുവിഭജനം സംബന്ധിച്ച വാര്‍ത്തകളോട് പ്രതികരിക്കുകയായിരുന്നു അദ്ദേഹം.ചിലപ്പോള്‍ ചില ത്യാഗങ്ങളൊക്കെ നടത്തേണ്ടിവരും. ചിലര്‍ക്കെല്ലാം അസംതൃപ്തി ഉണ്ടായെന്നും വരും. അസംതൃപ്തരുമായി ഹൈക്കമാന്റും അവരുടെ പ്രതിനിധികളും സംസാരിക്കും ഖാര്‍ഗെ പറഞ്ഞു.ജെ.ഡി.എസും കോണ്‍ഗ്രസും ഒന്നിച്ചു പോകേണ്ടത് അത്യാവശ്യമാണ്. ലോക്‌സഭ തെരഞ്ഞെടുപ്പ് അടുത്തെത്തി. യോജിച്ച് തെരഞ്ഞെടുപ്പിനെ നേരിടും. അതില്‍ വിജയിക്കുമെന്നാണ് വിശ്വാസമെന്നും ഖാര്‍ഗെ പറഞ്ഞു.
കുമാരസ്വാമി സര്‍ക്കാര്‍ മന്ത്രിസഭയില്‍ ആദ്യ ഘട്ടത്തില്‍ ഇടം ലഭിക്കാത്ത എം.എല്‍.എമാര്‍ കോണ്‍ഗ്രസ് നേതൃത്വത്തിനെതിരേ രംഗത്തെത്തിയിരുന്നു. സിദ്ധരാമയ്യ സര്‍ക്കാറില്‍ മന്ത്രിയായിരുന്ന എം.ബി പാട്ടീലിന്റെ നേതൃത്വത്തില്‍ 20 ഓളം എം.എല്‍.എമാരാണ് കോണ്‍ഗ്രസ് നേതൃത്വത്തിനെതിരേ രംഗത്തെത്തിയത്.