കോഴിക്കോട്: സ്പ്രിംഗ്ലര്‍ ഡാറ്റാ കൈമാറ്റ വിവാദം സി.ബി.ഐ അന്വേഷിക്കണമെന്ന്  കെ മുരളീധരന്‍ എം.പി. സ്പ്രിംഗ്ലര്‍  കമ്പനിയുമായി കരാര്‍ ഒപ്പിട്ടത് മാനദണ്ഡം പാലിക്കാതെയാണ്. വിദേശ കമ്പനിയുമായി കരാര്‍ ഒപ്പിടുമ്പോള്‍ കേന്ദ്ര ഗവണ്‍മെന്റിന്റെ  അനുവാദം വാങ്ങണം. 

അത് പാലിക്കപ്പെട്ടില്ല. മന്ത്രിസഭയുടെ അനുമതിയില്ലാതെ വകുപ്പ് സെക്രട്ടറി മാത്രം എങ്ങനെയാണ് അന്താരാഷ്ട്ര കമ്പനിയുമായി കരാറുണ്ടാക്കുകയെന്നും മുരളീധരന്‍ ചോദിച്ചു. ഇക്കാര്യത്തില്‍ മുഖ്യമന്ത്രി അന്വേഷണം നേരിടണം. ലോക്ക് ഡൗണിനു ശേഷം  വിഷയത്തില്‍ കോണ്‍ഗ്രസ് പ്രത്യക്ഷ സമരം നടത്തുമെന്നും മുരളീധരന്‍ വാര്‍ത്താസമ്മേളനത്തില്‍ പറഞ്ഞു.  സോളാറില്‍ പ്രതിപക്ഷം ഉന്നയിച്ച ജുഡിഷ്യല്‍ കമ്മിഷന്‍ ആവശ്യം ഉമ്മന്‍ചാണ്ടി അംഗീകരിച്ചിരുന്നുവെന്നും മുരളീധരന്‍ ഓര്‍മിപ്പിച്ചു. ക്വാറന്റൈനില്‍ താമസിപ്പിക്കാന്‍ സന്നദ്ധരായ സംസ്ഥാനങ്ങളിലുള്ള  പ്രവാസികളെ തിരികെ കൊണ്ടു വരാന്‍ കേന്ദ്ര സര്‍ക്കാര്‍ തയാറാകണം. 

പ്രവാസികളുടെ ജീവന്‍ കൊണ്ടു പന്താടാന്‍ കഴിയില്ല. ഇക്കാര്യം പ്രധാനമന്ത്രി മുഖ്യമന്ത്രിയുമായി സംസാരിക്കണമെന്നും മുരളീധരന്‍ ആവശ്യപ്പെട്ടു.  കൈയിട്ടു വാരുന്നവര്‍ ഇടതു പക്ഷത്തില്‍ തന്നെയുണ്ട്. അതിന് ഉദാഹരണമാണ് പ്രളയ ഫണ്ടില്‍ നടത്തിയ തിരിമറികള്‍.കെ.എം ഷാജി എം.എല്‍.എയ്‌ക്കെതിരേ നടപടിയെടുത്ത സംഭവം നിയമപരമായും രാഷ്ട്രീയപരമായും നേരിടുമെന്നും കെ. മുരളീധരന്‍ കൂട്ടിച്ചേര്‍ത്തു.