മലമ്പുഴ: ജലസേചന വകുപ്പ് ഡിവിഷന്‍ ഓഫീസിന്റെ അറ്റകുറ്റപ്പണികള്‍ വൈകുന്നു. മന്തക്കാട് ഐ.ടി.ഐയ്ക്ക് സമീപം പ്രവര്‍ത്തിക്കുന്ന ഡിവിഷന്‍ ഓഫീസിന്റെ അറ്റകുറ്റപ്പണികളാണ് 9 മാസം കഴിഞ്ഞിട്ടും ഇനിയും തുടങ്ങാത്തത്. മേല്‍ക്കൂരയുടെ ഒരു ഭാഗം ചിതലരിച്ച് വീണതിനെ തുടര്‍ന്ന് 9 മാസം മുന്‍പ് അറ്റകുറ്റപ്പണികള്‍ക്കായി ഓഫീസ് അടച്ചിടുകയായിരുന്നു. ജലസേചനവകുപ്പിന്റെ എക്‌സി. എന്‍ജിനീയറുടെ ഓഫീസാണിത്. അറ്റകുറ്റപണികള്‍ വൈകിയതോടെ കെട്ടിടത്തിന്റെ അവസ്ഥ കൂടുതല്‍ മോശമായിത്തുടങ്ങി. 60 വര്‍ഷത്തോളം പഴക്കമുള്ള കെട്ടിടത്തിന്റെ പല ഭാഗങ്ങളും ഇപ്പോള്‍ത്തന്നെ ചിതലിട്ട് കിടക്കുകയാണ്. കാലപ്പഴക്കം മൂലം ചോര്‍ന്നൊലിച്ചും ഓടുകളിളകിയും ഏറെ ശോച്യാവസ്ഥയിലാണ് ഓഫീസ്. അറ്റകുറ്റപ്പണികള്‍ ഇനിയും നീണ്ടുപോയാല്‍ ഏറെ താമസിയാതെ കെട്ടിടം നിലം പൊത്തുമെന്ന അവസ്ഥയിലാണ്. സമീപത്ത് ഇതോടൊപ്പം നിര്‍മ്മിച്ച അനേകം ക്വാര്‍ട്ടേഴ്‌സുകള്‍ ഇത്തരത്തില്‍ പൂട്ടിക്കിടക്കുന്നതിനാല്‍ നശിച്ചു പോയിട്ടുണ്ട്. കെട്ടിടത്തിന്റെ ശോച്യാവസ്ഥമൂലം മലമ്പുഴ ഇന്‍ഫര്‍മേഷന്‍ സെന്ററിലാണ് ഡിവിഷന്‍ ഓഫീസ് താത്കാലികമായി പ്രവര്‍ത്തിക്കുന്നത്. എന്നാല്‍ പൂട്ടിയിട്ട ഡിവിഷന്‍ ഓഫീസിനോട് ചേര്‍ന്ന് മെക്കാനിക് വിഭാഗവും സബ് ഡിവിഷന്‍ ഓഫീസും പ്രവര്‍ത്തിക്കുന്നുണ്ട്. അതേ സമയം കെട്ടിടത്തിന്റെ അറ്റകുറ്റപ്പണികള്‍ക്കായി ടെന്‍ഡര്‍ നടപടികള്‍ പൂര്‍ത്തിയായി വരികയാണെന്നും വൈകാതെ പണികള്‍ ആരംഭിക്കുമെന്നുമാണ് അധികൃതരുടെ വാദം.