മനാമ: ബഹ്‌റൈനില്‍ മത്സ്യബന്ധനത്തിനിടെ ഇറാന്‍ പിടികൂടിയ ഇന്ത്യന്‍ മത്സ്യത്തൊഴിലാളികള്‍ മോചിതരായി. ഇവര്‍ തിങ്കളാഴ്ച ബഹ്‌റൈന്‍ തീരത്ത് തിരിച്ചെത്തിയെങ്കിലും വിസ കാലാവധി കഴിഞ്ഞതിനാല്‍ സ്‌പോണ്‍സര്‍ക്ക് പിഴ അടക്കേണ്ടി വന്നു. തമിഴ്‌നാട് സ്വദേശികളായ സത്യസാഗര്‍ വിജയ ബാബു, ജോസഫ് കെന്നഡി, ശ്രീജിത്ത് ഉദയകുമാര്‍, ക്ലൗഡിന്‍ നസ്‌റിന്‍, ആന്റണി എഡ്വിന്‍, ജോര്‍ജ് കെവ, രവി രാമസ്വാമി, ജോര്‍ജ് സുധാകരന്‍, വിന്‍സന്റ് രായപ്പന്‍, പ്രശാന്ത് സവേരിയന്‍, ശ്രീനു ഉദയകുമാര്‍, രാജേഷ് കുമാര്‍ മാരിമുത്തു, ക്യാപ്റ്റന്‍മാരായ ആന്റണി ജേക്കബ്, വര്‍ഗീസ്, സെലറ്റ് രാജ എന്നിവരുള്‍പ്പെടെ 15 ഇന്ത്യക്കാരും ആറു ബംഗ്ലാദേശികളുമാണ് സംഘത്തിലുണ്ടായിരുന്നത്.
കഴിഞ്ഞ വര്‍ഷം 2016 ഒക്ടോബറിലാണ് മത്സ്യബന്ധനത്തിനിടെ തമിഴ്‌നാട്ടുകാരായ 15 മത്സ്യത്തൊഴിലാളികളുള്‍പ്പെടുന്ന സംഘത്തെ അതിര്‍ത്തി ലംഘിച്ചതായി ആരോപിച്ച് ഇറാന്‍ അധികൃതര്‍ പിടികൂടിയത്. തുടര്‍ന്ന് കിഷ് ദ്വീപില്‍ ഇവരെ തടഞ്ഞുവയ്ക്കുകയായിരുന്നു. മതിയായ ഭക്ഷണവും വെള്ളവും രോഗികളായവര്‍ക്ക് മരുന്നുമില്ലാതെ ദയനീയ സാഹചര്യത്തിലാണ് തൊഴിലാളികള്‍ കഴിയുന്നതെന്ന വാര്‍ത്ത മാധ്യമങ്ങളിലൂടെ പുറത്തുവന്നു. തുടര്‍ന്ന് തമിഴ്‌നാട്ടിലെ വിവിധ സംഘടനകളും സാമൂഹിക പ്രവര്‍ത്തകരും പ്രതിഷേധവുമായി രംഗത്തെത്തി. 2017 മാര്‍ച്ച് 14നാണ് ഇവരെ വിട്ടയക്കാന്‍ ഇറാന്‍ കോടതി ഉത്തരവിട്ടത്.  ഇറാനില്‍ തുടര്‍ച്ചയായി അവധി ദിനങ്ങളായതിനാല്‍ ബഹ്‌റൈനിലേക്ക് മടങ്ങാന്‍ ഇവര്‍ക്ക് കഴിഞ്ഞിരുന്നില്ല.