പൂച്ചാക്കല്‍: അരൂക്കുറ്റി പഞ്ചായത്തില്‍ തുടര്‍ച്ചയായ മൂന്നാം ദിവസവും ഹര്‍ത്താല്‍ ആചരിക്കുന്നത് ജനങ്ങളെ ദുരിതത്തിലാക്കി. പൊതുമരാമത്ത് വകുപ്പ് സ്ഥലം കൈയേറിയുള്ള നിര്‍മാണങ്ങള്‍ ഒഴിപ്പിക്കുന്നതുമായി ബന്ധപ്പെട്ട് മര്‍ച്ചന്റ് അസോസിയേഷന്റെ നേതൃത്വത്തില്‍ ബുധനാഴ്ച പഞ്ചായത്ത് പ്രദേശത്ത് ഹര്‍ത്താല്‍ ആചരിച്ചിരുന്നു.
സംസ്ഥാന ഹര്‍ത്താലിന്റെ ഭാഗമായി വ്യാഴാഴ്ചയും ഹര്‍ത്താലായി. ജില്ലാ ഹര്‍ത്താലിന്റെ ഭാഗമായി മൂന്നാം ദിവസമായ ഇന്നും ഹര്‍ത്താലാണ്.
പൊടുന്നനെ വന്നുപെട്ട മൂന്നു ഹര്‍ത്താലുകള്‍ ജനജീവിതത്തെ സാരമായി ബാധിച്ചിരിക്കുകയാണ്. പല വീടുകളിലും അടുക്കള കാലിയായിരിക്കുകയാണ്. മരാമത്ത് പണികള്‍ നിശ്ചലമായത് തൊഴിലാളികളെയും സാരമായി ബാധിച്ചു.
കൂലിവേല ചെയ്ത് ഉപജീവനം നടത്തുന്ന വീടുകള്‍ പട്ടിണിയിലായി. മത്സൃം, പച്ചക്കറി, പഴവര്‍ഗങ്ങള്‍ എന്നിവ വില്‍പന നടത്തുന്ന വ്യാപാര സ്ഥാപനങ്ങളിലെ സാധനങ്ങള്‍ ചീഞ്ഞ് വില്‍പനക്ക് പറ്റാതായി.
ഇത് സാധാരണക്കാരായ കച്ചവടക്കാര്‍ക്ക് സാമ്പത്തിക ബാധ്യതയാണ് ഉണ്ടാക്കുന്നത്. ഹര്‍ത്താല്‍ കൊണ്ട് പൊറുതിമുട്ടിയ ജനം ഹര്‍ത്താലിനെതിരെ രംഗത്ത് വരാനും തയാറാവുന്നു.
ഇതിനിടയില്‍ ഇന്നലെ വടുതല ജങ്ഷനില്‍ ഹര്‍ത്താല്‍ അനുകൂലികളും എസ്.ഡി.പി.ഐ പ്രവര്‍ത്തകരുമായി സംഘട്ടനം ഉണ്ടായത് സ്വൗര്യ ജീവിതത്തിനും തടസമായിരിക്കുകയാണ്.