മലപ്പുറം: തെരഞ്ഞെടുപ്പ് കമ്മിഷന്റെ അനുമതി ലഭിച്ചു പ്രചാരണത്തിനായെത്തുന്ന പാര്‍ട്ടിയിലെ സ്റ്റാര്‍ നേതാക്കളുടെ യാത്രാചെലവ് സ്ഥാനാര്‍ഥിയുടെ തെരഞ്ഞെടുപ്പ് ചെലവില്‍ ഉള്‍പ്പെടുത്തില്ലെന്നു ചെലവ് നിരീക്ഷകന്‍ പുഷ്‌കല്‍ ഉപാധ്യായ അറിയിച്ചു.

എന്നാല്‍, തെരഞ്ഞെടുപ്പ് വിജ്ഞാപനം നടത്തി നിശ്ചിത ദിവസത്തിനകം മുഖ്യ തെരഞ്ഞെടുപ്പ് ഉദ്യോഗസ്ഥനേയും കേന്ദ്ര തെരഞ്ഞെടുപ്പ് കമ്മിഷനേയും പേരുവിവരം അറിയിച്ചിട്ടുള്ളവര്‍ക്കു മാത്രമേ ഇതിന്റെ ആനുകൂല്യം ലഭിക്കൂ. അംഗീക്യത പാര്‍ട്ടികള്‍ക്ക് 40 പേരെ വരെ ഈ രീതിയില്‍ പ്രചാരണത്തിനുപയോഗിക്കാം. മറ്റു പാര്‍ട്ടികള്‍ക്ക് 20 ആളുകളെയും ഉപയോഗിക്കാം. നിശ്ചിത സമയത്തിനകം ഇത്തരം അറിയിപ്പ് ലഭിച്ചിട്ടില്ലാത്ത പാര്‍ട്ടികളുടെ നേതാക്കളുടെ യാത്രാചെലവ് സ്ഥാനാര്‍ഥിയുടെ ചെലവായി പരിഗണിക്കും.