കാളികാവ്: തണല്‍ പ്രവാസി കൂട്ടായ്മ കനിഞ്ഞു, ശാന്തി സദന്‍ അന്തേവാസികളായ ആയിശക്കും  കൂട്ടുകാര്‍ക്കും പെരുന്നാള്‍ പുത്തന്‍ പുടവ ലഭിച്ചു. ജീവിത വഴിയില്‍ തനിച്ചായ ആയിശക്ക് കുഞ്ഞുനാളിലെ പെരുന്നാളിന്റെ ഓര്‍മ മാത്രമാണുള്ളത്. വീടും വീട്ടുകാരേയും തിരിച്ചറിയാതെ ഓര്‍മ നഷ്ടപ്പെട്ട കാണ്‍പൂര്‍കാരിയായ അയിശ ഇപ്പോഴുള്ളത് ചോക്കാട് ശാന്തി സദനത്തിലാണ്. തെരുവിലൂടെ അലഞ്ഞു നടന്ന ആയിശയെ രണ്ടു വര്‍ഷം മുമ്പാണ് ശാന്തി സദനത്തിലെത്തിച്ചത്. ആരോരുമില്ലാത്തവരും ഉറ്റവരും ഉടയവരും ഉപേക്ഷിച്ച സ്ത്രീകള്‍ മാത്രമാണ് ശന്തി സദനിലെ അന്തേവാസികള്‍.
ചോക്കാട്ടിലെ പ്രവാസികളുടെ കൂട്ടായ്മയായ തണല്‍ പ്രവര്‍ത്തകരാണ് ശാന്തി സദനിലെ അന്തേവാസികള്‍ക്ക് പെരുന്നാള്‍ പുടവ നല്‍കാന്‍ ഒത്തുചേര്‍ന്നത്. റമദാനില്‍ ശാന്തി സദനില്‍ ഭക്ഷണം നല്‍കാനായിരുന്നു തീരുമാനിച്ചിരുന്നത്. എന്നാല്‍ ഓര്‍മയില്‍ നിന്ന് മാഞ്ഞു പോയ പെരുന്നാളിനെ വീണ്ടെടുക്കാനായി പുതുവസ്ത്രങ്ങള്‍ വാങ്ങിച്ചു നല്‍കി. പണ്ടെന്നോ പെരുന്നാളിന് പിതാജി ഉടുപ്പ് വാങ്ങിച്ചു നല്‍കിയത് മാത്രമാണ് പെരുന്നാളിനെക്കുറിച്ച് ആയിശയുടെ ഓര്‍മ.
രണ്ടു വര്‍ഷത്തിനിടയില്‍ ഒരുക്കല്‍ പോലും ചിരി വിടരാത്ത ആയിശയുടെ ചുണ്ടുകള്‍ പെരുന്നാള്‍ പുടവകള്‍ ഏറ്റുവാങ്ങിയപ്പോള്‍ വിടര്‍ന്നു. ആയിശയുടെ മുഖത്തെ സന്തോഷത്തില്‍ ശാന്തി സദനിലെ മുഴുവന്‍ അന്തേവാസികളും പങ്കുചേര്‍ന്നു. ചോക്കാട് തണല്‍ കൂട്ടായ്മ പ്രസിഡന്റ് പ്രസാദ് ഉള്ളാട്ടില്‍, അംഗങ്ങളായ ഗോപാലകൃഷ്ണന്‍  പെരുമ്പലത്ത്, ഉണ്ണികൃഷ്ണന്‍ നുണംപാറം, കെ.ടി.ഗഫൂര്‍, നാട്ടിലെ കമ്മറ്റി അംഗങ്ങളായ അസ്‌കര്‍  ബംഗാളത്ത്, പി.സിദ്ദീഖ്, പ്രകാശന്‍ കിഴക്കേകര എന്നിവര്‍ പെരുന്നാള്‍ പുടവ വിതരണം ചെയ്തു.