മുംബൈ: ഇംഗ്ലണ്ടിനെതിരേയുള്ള ഏകദിന പരമ്പരയിലെ അവസാന മത്സരത്തില്‍ ഇന്ത്യന്‍ വനിതകള്‍ക്ക് കാലിടറി. രണ്ട് വിക്കറ്റിനാണ് മൂന്നാം ഏകദിനത്തില്‍ ഇംഗ്ലണ്ടിന്റെ വിജയം. ആദ്യ രണ്ട് ഏകദിനങ്ങളില്‍ ജയിച്ച ഇന്ത്യന്‍ വനിതകള്‍ നേരത്തെ തന്നെ പരമ്പര സ്വന്തമാക്കിയിരുന്നു. ഇന്ത്യ ഒരുക്കിയ 206 റണ്‍സ് വിജയലക്ഷ്യം പിന്തുടര്‍ന്ന ഇംഗ്ലണ്ട് ഏഴ് പന്ത് ബാക്കി നിര്‍ത്തിയാണ് വിജയത്തിലെത്തിയത്. എട്ട് വിക്കറ്റ് നഷ്ടപ്പെടുത്തിയാണ് ഇംഗ്ലണ്ടിന്റെ ജയം. ഒരു ഘട്ടത്തില്‍ പരാജയം മണത്ത ഇംഗ്ലണ്ടിനെ എട്ടാം വിക്കറ്റില്‍ ഒത്തുചേര്‍ന്ന എല്‍വിസ്-ബ്രണ്ട് കൂട്ടുകെട്ടാണ് വിജയത്തിലെത്തിച്ചത്.

ടോസ് നേടിയ ഇന്ത്യ ബാറ്റിങ് തിരഞ്ഞെടുക്കുകയായിരുന്നു. സ്മൃതി മന്ദാനയുടെയും (66) പൂനം റൗത്തിന്റെയും (56) അര്‍ധ സെഞ്ചുറികളുടെ ബലത്തില്‍ ഇന്ത്യ 205 റണ്‍സിന്റെ ഭേദപ്പെട്ട സ്‌കോര്‍ കണ്ടെത്തി. ഇന്ത്യക്ക് വേണ്ടി ദീപ്തി ശര്‍മ പുറത്താവാതെ (27) ശിഖ പാണ്ഡെ (26) എന്നിവരും തിളങ്ങി. മറുപടി ബാറ്റിങ്ങിനെത്തിയ ഇംഗ്ലണ്ട് ഹെതര്‍ നൈറ്റ് (47), ഡാനിയേലെ വ്യാട്ട് (56), എല്‍വിസ് (33), ബീമോണ്ട് (21), ബ്രണ്ട് (18) എന്നിവരുടെ ബാറ്റിങ് മികവിലാണ് വിജയത്തിലെത്തിയത്. ഇന്ത്യക്ക് വേണ്ടി ജ്വുലന്‍ ഗോസ്വാമി മൂന്ന് വിക്കറ്റ് വീഴ്ത്തി. ശിഖ പാണ്ഡെ, പൂനം യാദവ് എന്നിവര്‍ രണ്ട് വിക്കറ്റും വീഴ്ത്തി.