പുതുക്കാട്: കുറുമാലിപുഴയിലെ എല്ലാ ജലസേചന പദ്ധതികളുടെ പ്രവര്‍ത്തനവും തല്‍ക്കാലികമായി നിര്‍ത്തിവയ്ക്കാന്‍ ഇറിഗേഷന്‍ വകുപ്പിന്റെ നിര്‍ദേശം. പടിഞ്ഞാറന്‍ കോള്‍പടവുകളിലെ കൃഷിക്ക് വെള്ളമെത്തിക്കുന്നതിനാണ് നടപടി.
ഇറിഗേഷന്‍ വകുപ്പിന്റെ നിര്‍ദേശം മേഖലയിലെ ആയിരക്കണക്കിന് ഹെക്ടര്‍ കാര്‍ഷികമേഖലക്കാണ് തിരിച്ചടിയാകുന്നത്. മേജര്‍ ഇറിഗേഷന്‍ എക്‌സിക്യുട്ടീവ് എന്‍ജിനീയറാണ് നിര്‍ദേശം നല്‍കിയിരിക്കുന്നത്. നാളെ മുതല്‍ പമ്പിങ് നിര്‍ത്തിവയ്ക്കാനാണ് നിര്‍ദേശം.
കുറുമാലിപുഴയില്‍ സര്‍ക്കാര്‍, സ്വകാര്യ പദ്ധതികള്‍ ഉള്‍പ്പടെ നൂറോളം ജലസേചന പദ്ധതികളാണ് പ്രവര്‍ത്തിക്കുന്നത്. ഇതിന്റെയെല്ലാം പ്രവര്‍ത്തനം നിലച്ചാല്‍ കൃഷി നാശത്തിന് പുറമെ രൂക്ഷമായ കുടിവെള്ള ക്ഷാമവുമാണ് നേരിടേണ്ടി വരിക. വരന്തരപ്പിള്ളി, പുതുക്കാട്, പറപ്പൂക്കര പഞ്ചായത്തുകളിലായി പ്രവര്‍ത്തിക്കുന്ന പ്രധാനപ്പെട്ട ജലസേചന പദ്ധതികളില്‍ നിന്നാണ് പുതുക്കാട് മണ്ഡലത്തിന്റെ പകുതിയോളം കാര്‍ഷിമേഖലയിലേക്ക് വെള്ളമെത്തിക്കുന്നത്.
ഒരാഴ്ചയോളം പമ്പിങ് നിര്‍ത്തിവയ്‌ക്കേണ്ടി വന്നാല്‍ ഭൂരിഭാഗം കാര്‍ഷിക വിളകളും വരണ്ടുണങ്ങും. നൂറ് കണക്കിന് കര്‍ഷകരാണ് ആശങ്കയിലായിരിക്കുന്നത്. പുഴയില്‍ പമ്പിങ് നടക്കുന്നതുമൂലം കോള്‍പടവുകളിലേക്ക് ആവശ്യത്തിന് വെള്ളമെത്തുന്നില്ലെന്ന നെല്‍കര്‍ഷകരുടെ പരാതിയെ തുടര്‍ന്നാണ് ഇറിഗേഷന്‍ അധികൃതര്‍ പമ്പിങ് നിര്‍ത്തിവയ്ക്കാന്‍ നിര്‍ദേശിച്ചത്.
ചിമ്മിനി ഡാമില്‍ ആവശ്യത്തിന് വെള്ളമുള്ളപ്പോള്‍ കൂടുതല്‍ വെള്ളം തുറന്നുവിട്ട് പ്രശ്‌നത്തിന് പരിഹാരം കാണണമെന്നാണ് മേയലയിലെ കര്‍ഷകരുടെ ആവശ്യം. എന്നാല്‍ ഡാമില്‍ നിന്ന് കൂടുതല്‍ വെള്ളം തുറന്നുവിട്ടാല്‍ പുഴയിലെ താല്‍ക്കാലിക മണ്‍ചിറകള്‍ തകരുമെന്നതിനാല്‍ കര്‍ഷകരുടെ ആവശ്യം നിരാകരിച്ചിരിക്കുകയാണ് അധികൃതര്‍.
കുറുമാലിപുഴയെ ആശ്രയിച്ച് നിലനില്‍ക്കുന്ന കാര്‍ഷികമേഖലക്ക് തിരിച്ചടിയാകാത്തവിധം എല്ലാവര്‍ക്കും വെള്ളം എത്തിക്കാനുള്ള നടപടികള്‍ ഇറിഗേഷന്‍ അധികൃതര്‍ കൈക്കൊള്ളമെന്നാണ് കര്‍ഷകരുടെ ആവശ്യം.