എടപ്പാള്‍: കേരളത്തില്‍ ആദ്യമായി നടക്കുന്ന പര്‍ജന്യ യാഗത്തിന് എടപ്പാള്‍ വട്ടംകുളം എരുവപ്രക്കുന്ന് അയ്യപ്പസ്വാമിക്ഷേത്രത്തില്‍ ഒരുക്കങ്ങള്‍ പൂര്‍ത്തിയായതായും ഇന്ന് വൈകിട്ട് മൂന്നിനു ശുകപുരം ദക്ഷിണാമൂര്‍ത്തീ ക്ഷേത്രപരിസരത്തുനിന്ന് ആരംഭിക്കുന്ന വിളംബര ഘോഷയാത്രയോടെ പരിപാടികള്‍ക്കു തുടക്കമാകുമെന്നും സംഘാടകര്‍ വാര്‍ത്താസമ്മേളനത്തില്‍ പറഞ്ഞു.
വൈകിട്ട് ആറിനു നടക്കുന്ന സാംസ്‌കാരിക സഭയില്‍ മഹാകവി അക്കിത്തം യാഗവിളംബരം നടത്തും. നാളെ പുലര്‍ച്ചെ അഷ്ടദ്രവ്യ ഗണപതിഹോമത്തോടെ ചടങ്ങുകള്‍ക്കു തുടക്കമാകും. കേരളത്തിലെയും മഹാരാഷ്ട്രയിലെയും പ്രമുഖ വേദജ്ഞര്‍ ചടങ്ങുകള്‍ക്കു കാര്‍മികത്വം വഹിക്കും.10ന് വൈകിട്ട് ആറിന് നടക്കുന്ന സാംസ്‌കാരിക സമ്മേളനം മന്ത്രി കെ.ടി.ജലീല്‍ ഉദ്ഘാടനം ചെയ്യുമെന്നും സംഘാടകര്‍ വാര്‍ത്താ സമ്മേളനത്തില്‍ അറിയിച്ചു. യാഗ യജമാനന്‍ നരിപ്പറമ്പ് മനയ്ക്കല്‍ വാസുദേവന്‍ നമ്പൂതിരി,വേദജ്ഞന്‍ ഡോ. നാറാസ് ഇട്ടിരവി നമ്പൂതിരി,ക്ഷേത്രം മേല്‍ശാന്തി സതീഷ് ദേശ്മുഖ്,യജ്ഞസമിതി ഭാരവാഹികളായ കെ.കുഞ്ഞന്‍,ഇ.വേണുഗോപാല്‍, മണികണ്ഠന്‍ കൊഴിക്കര,കെ.പി.അശോകന്‍,ടി.പ്രദീപ്, എം.വി.ബാലന്‍ പങ്കെടുത്തു.