കല്‍പ്പറ്റ: നീരൊഴുക്കുനിലച്ച തോടുകളും ഇല്ലാതാകുന്ന പൊന്തകളും ചതുപ്പുകളും നെല്‍പ്പാടങ്ങളുടെ അളവിലുണ്ടാകുന്ന കുറവും വയനാട്ടില്‍ നീര്‍പക്ഷികളുടെ നിലനില്‍പ്പ് ദുഷ്‌കരമാക്കുന്നു. ആവാസ വ്യവസ്ഥയുടെ തകര്‍ച്ച ജില്ലയില്‍ ജലപക്ഷി വൈവിധ്യത്തിന്റെ ശോഷണത്തിനു കാരണമാകുകയാണ്.

പാടങ്ങള്‍ക്കരികിലൂടെ ഒഴുകുന്ന തോടുകളോടു ചേര്‍ന്നുള്ള പൊന്തകളുടെയും ചതുപ്പുകളുടെയും നാശം നീര്‍പക്ഷികള്‍ക്ക് കൂടൊരുക്കാനും പ്രജനനം നടത്താനുമുള്ള ഇടം നഷ്ടമാക്കുകയാണ്. കുളക്കോഴി കുടുംബത്തില്‍പ്പെട്ട പക്ഷിയിനങ്ങള്‍ ജില്ലയില്‍ അപൂര്‍വ കാഴ്ചയാണിപ്പോള്‍. ചെങ്കണ്ണി തിപ്പരി, വാലന്‍ താമരക്കോഴി, നാടന്‍ താമരക്കോഴി, പട്ടക്കോഴി, ചുവന്ന നെല്ലിക്കോഴി, തിവിടന്‍ നെല്ലിക്കോഴി, നീലമാറന്‍ കുളക്കോഴി, കാളിക്കാള (പടംവിരുത്തിപ്പക്ഷി) എന്നിങ്ങനെ നീളുകയാണ് കുളക്കോഴി കുടുംബത്തില്‍ വംശനാശത്തിന്റെ വക്കിലുള്ള പക്ഷിയിനങ്ങളുടെ നിര.

മുന്നുനാലു പതിറ്റാണ്ടുകള്‍ മുന്‍പുവരെ ജില്ലയിലെ വയലുകളിലും സമീപങ്ങളിലും സാധാരണമായിരുന്നു ഇവയുടെ സാന്നിധ്യം. വയല്‍നാടെന്നു ഖ്യാതിയുള്ള വയനാട്ടില്‍ 1960കളില്‍ ഏകദേശം 40,000 ഹെക്ടറിലായിരുന്നു നെല്‍കൃഷി. ഇപ്പോഴിത് 10,000 ഹെക്ടറിനു ചുവടെയാണ്. കഴിഞ്ഞ ഒരു ദശാബ്ദത്തിനിടെ നൂറുകണക്കിനു ഹെക്ടര്‍ പാടങ്ങളിലാണ് കമുകും വാഴയും ഇഞ്ചിയും ഉള്‍പ്പെടെ കൃഷികള്‍ ഇടംപിടിച്ചത്. ഇതിനു പുറമെയാണ് കൃഷിരീതികളിലുണ്ടായ മാറ്റം. ചാണകവും പച്ചിലവളങ്ങളും കൃഷിക്ക് ഉപയോഗിച്ചിരുന്ന കര്‍ഷകര്‍ രാസവളങ്ങളുടെയും കീടനാശിനികളുടെയും പിന്നാലെ നീങ്ങി. ഇവയുടെ അശാസ്ത്രീയ പ്രയോഗം വയലുകളിലടക്കം വ്യാപകമായി.

കാലപ്രയാണത്തില്‍ ഇതുളവാക്കിയ പരിസ്ഥിതിത്തകര്‍ച്ചയുടെ തിക്തഫലമാണ് നീര്‍പക്ഷികളും നേരിടുന്നതെന്ന് പരിസ്ഥിതി പ്രവര്‍ത്തകര്‍ ചൂണ്ടിക്കാട്ടുന്നു. കഴിഞ്ഞ രണ്ട് പതിറ്റാണ്ടിനിടെ ജില്ലയില്‍ കൊറ്റികളുടെ എണ്ണത്തില്‍ ഗണ്യമായ കുറവാണുണ്ടായത്. വലിയ വെള്ളരിക്കൊക്ക്, ചെറിയ വെള്ളരിക്കൊക്ക്, കാലിക്കൊക്ക്, ചായക്കൊക്ക്, കുളക്കൊക്ക്, രാക്കൊക്ക്, അരിവാള്‍ കൊക്കന്‍ എന്നിവയുടെ സജീവസാന്നിധ്യം പനമരം, ആറാട്ടുതറ, വെണ്ണിയോട് എന്നിവിടങ്ങളില്‍ മാത്രമാണിപ്പോള്‍. പുഴയോടുചേര്‍ന്നുള്ള ഈ ആവാസവ്യവസ്ഥകളും നാശം നേരിടുകയാണ്.

വാഴകൃഷി കീഴടക്കുന്നതിനു മുന്‍പുള്ള കാലത്ത് കൊറ്റിക്കൂട്ടങ്ങളെക്കൊണ്ട് സമ്പന്നമായിരുന്നു ജില്ലയിലെ വയലുകള്‍. നീര്‍പക്ഷികളുടെ സംരക്ഷണത്തിനു നെല്‍കൃഷിയുടെ വീണ്ടെടുപ്പും പ്രകൃതിക്ക് ഇണങ്ങിയ കൃഷിരീതികളും അനിവാര്യമാണെന്ന് ഹ്യൂം സെന്റര്‍ ഫോര്‍ ഇക്കോളജി ആന്‍ഡ് വൈല്‍ഡ് ലൈഫ് ബയോളജി ഡയറക്ടര്‍ സി.കെ വിഷുണുദാസ് അഭിപ്രായപ്പെട്ടു. പൊന്തകളും ചതുപ്പുകളും നിലനിര്‍ത്തിയുള്ള തോട് സംരക്ഷണത്തില്‍ തദ്ദേശസ്ഥാപനങ്ങള്‍ ശ്രദ്ധചെലുത്തേണ്ടതുണ്ടെന്നും അദ്ദേഹം പറഞ്ഞു.