സ്റ്റോക്‌ഹോം: സ്വീഡനില്‍ കടയിലേക്ക് ലോറി ഇടിച്ചുകയറ്റി ഭീകരാക്രമണം. സംഭവത്തില്‍ മൂന്ന് കാല്‍നടയാത്രക്കാര്‍ കൊല്ലപ്പെട്ടു. സ്റ്റോക്‌ഹോമിലെ ഏറ്റവും തിരക്കുള്ള തെരുവായ ക്വീന്‍ സ്ട്രീറ്റില്‍ ഇന്നലെ വൈകിട്ട് മൂന്നോടെയാണ് ആക്രമണമുണ്ടായത്. സംഭവത്തില്‍ നിരവധി പേര്‍ക്കു പരുക്കേറ്റതായി പൊലിസ് വൃത്തങ്ങള്‍ അറിയിച്ചു.
നഗരത്തിന്റെ മറ്റു ഭാഗങ്ങളിലും വെടിവയ്പ്പ് നടന്നതായി സര്‍ക്കാര്‍ വൃത്തങ്ങള്‍ പറഞ്ഞു. ലോറി തട്ടിയെടുത്ത ശേഷമാണ് ആക്രമണമുണ്ടായതെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ലോറിയില്‍ ഒന്നിലേറെ പേര്‍ ഉണ്ടായിരുന്നതായി ദൃക്‌സാക്ഷികള്‍ പറഞ്ഞു. അന്വേഷണം ആരംഭിച്ചിട്ടുണ്ട്.
സംഭവത്തെ തുടര്‍ന്ന് ആളുകളെ നഗരത്തില്‍നിന്ന് ഒഴിപ്പിക്കുകയും പാര്‍ലമെന്റിലും സ്റ്റോക്‌ഹോം സബ് വേയിലും സുരക്ഷ ശക്തമാക്കുകയും ചെയ്തു.
നഗരത്തിലേക്കും നഗരത്തില്‍നിന്നു പുറത്തേക്കുമുള്ള എല്ലാ ട്രെയിന്‍ സര്‍വിസുകളും നിര്‍ത്തലാക്കിയിട്ടുണ്ട്.