മറയൂര്‍: ചിന്നാര്‍ വന്യജീവി സങ്കേതത്തിലെത്തുന്ന സഞ്ചാരികള്‍ക്ക് ഇനി ചെറുധാന്യങ്ങളുടെ രാജാവായ റാഗി ഉപയോഗിച്ചുള്ള ബിരിയാണി കഴിക്കാം. ചിന്നാര്‍ വന്യജീവി സങ്കേതത്തിലെ ഇക്കോ ടൂറിസം മേഖലയില്‍ ജോലി ചെയ്യുന്ന താല്‍ക്കാലിക ജീവനക്കാര്‍ക്ക് ഇതിനായി പ്രത്യേക പരിശീലനം നല്‍കി. കേരള ഇന്‍സ്റ്റിറ്റിയൂട് ഓഫ് ട്രാവല്‍ ആന്‍ഡ് ടൂറിസം സ്റ്റഡീസിന്റെ ആഭിമുഖ്യത്തില്‍ കഴിഞ്ഞ ഒന്നരമാസം കൊണ്ടാണ് പരിശീലനം നല്‍കിയത്.
ഇക്കോടൂറിസം മേഖലയില്‍ ജോലി ചെയ്യുന്ന ആദിവാസി സമൂഹത്തിന് പരിസ്ഥിതി അവബോധം, വിനോദ സഞ്ചാരികളുമായി ഇടപെടാനുള്ള അടിസ്ഥാന പരിശീലനം, ഇരുപതോളം വൈവിധ്യങ്ങളായ ഭക്ഷണങ്ങള്‍ തയ്യാറാക്കുന്നതിനുള്ള പരിശീലനം എന്നിവയാണ് പരിശീലന പരിപാടിയില്‍ ഉണ്ടായിരുന്നത്.
ചിന്നാര്‍ വന്യജീവി സങ്കേതത്തില്‍ ടൂറിസം പോയിന്റുകളായ ആലാംപെട്ടിയിലെ എത്‌നിക് കഫേയിലെ അംഗങ്ങള്‍, ചിന്നാര്‍ വനജ്യോല്‍സന റെസ്റ്റോറന്റ് എന്നിവിടങ്ങളിലെ ഇക്കോ ടൂറിസം അംഗങ്ങളെ രണ്ട് ഗ്രൂപ്പായി തിരിച്ചാണ് പാചക പരിശീലനം നല്‍കിയത്. ഇക്കോടൂറിസം മേഖലയില്‍ ജോലി ചെയ്ത് വരുന്ന 55 ഓളം പേരാണ് പരിശീലന പരിപാടിയില്‍ പങ്കെടുത്തത്. റാഗി കൊണ്ടുള്ള വൈവിധ്യങ്ങളായ പത്തോളം വിഭവങ്ങളും കൂടാതെ റാഗി, വരഗ് എന്നിവ കൊണ്ടുണ്ടാക്കിയ ചിക്കന്‍, വെജിറ്റബിള്‍ ബിരിയാണി, റാഗി പത്തിരി, കൂടാതെ റാഗി ലഡു, റാഗി പക്കാവട, തിന ലഡു, ചാമ ലഡു, റാഗി മുറുക്ക്, തിന അതിരസം, ചക്ക കൊണ്ടുള്ള അച്ചാര്‍, പക്കാവട, ചക്കക്കുരു പൂരി, ചക്കക്കുരു ചപ്പാത്തി എന്നിവയാണ് പ്രധാനമായും തയ്യാറാക്കി നല്‍കുന്നത്.
റാഗി, തിന, ചാമ, വരഗ് തുടങ്ങിയ പോഷക സമ്പുഷ്ടമായ ചെറുധാന്യങ്ങളില്‍ നിന്നും കൂടുതല്‍ മൂല്യവര്‍ദ്ധിത ഭക്ഷണ പദാര്‍ഥങ്ങള്‍ സ്വാദിഷ്ടമായി ഉണ്ടാക്കുകയും അവയുടെ വിപണനം വര്‍ധിപ്പിക്കുകയും ചെയ്യുക എന്നതാണ് ഇതുകൊണ്ട് ഉദ്ദേശിക്കുന്നത്. അതു വഴി ഇത്തരം ചെറു ധാന്യങ്ങള്‍ ആദിവാസി കുടികളില്‍ കൂടുതലായി ഉല്‍പ്പാദിപ്പിക്കാനും ഇതിന്റെ വിപണനം സാധ്യമാവുകയും കൂടാതെ പൊതു സമൂഹത്തില്‍ ഇതിന്റെ പ്രാധാന്യം വര്‍ധിപ്പിക്കുകയും ചെയ്യാന്‍ കഴിയും എന്ന് വനംവകുപ്പ് ഉദ്യോഗസഥര്‍ പറയുന്നു.