ജൊഹാനസബര്‍ഗ്: ആഫ്രിക്കന്‍ സന്ദര്‍ശനത്തിനുള്ള പ്രധാനമന്ത്രി നരേന്ദ്ര മോദി ദക്ഷിണാഫ്രിക്കയില്‍ ഇന്ത്യന്‍ സമൂഹത്തെ അഭിസംബോധന ചെയ്തു. നെല്‍സല്‍ മണ്ടേലയുടെ ജന്മഭൂമിയായ ദക്ഷിണാഫ്രിക്ക മഹാത്മ ഗാന്ധിയുടെ കര്‍മഭൂമിയാണെന്ന് മോദി പറഞ്ഞു.

മോഹന്‍ദാസിനെ മഹാത്മയാക്കിയത് ദക്ഷിണാഫ്രിക്കയാണ്. വര്‍ണ്ണവിവേചനത്തിനെതിരെ ദക്ഷിണാഫ്രിക്കയെ അപലപിച്ച ഇന്ത്യ അത് അവസാനിപ്പിച്ചപ്പോള്‍ ദക്ഷിണാഫ്രിക്കയെ പുല്‍കിയിട്ടുണ്ടെന്നും മോദി പറഞ്ഞു.

വെള്ളിയാഴ്ച ദക്ഷിണാഫ്രിക്കയിലെത്തി മോദി പ്രസിഡന്റ് ജേക്കബ് സുമയുമായി പ്രിട്ടോറിയയില്‍ ചര്‍ച്ച നടത്തിയിരുന്നു. തുടര്‍ന്ന് ഇരുവരും സംയുക്ത വാര്‍ത്താ സമ്മേളനവും നടത്തി. സാമ്പത്തിക സഹകരണം വിപുലമാക്കുന്നതിനും പ്രതിരോധം, ഉല്‍പാദനം, ഖനനം തുടങ്ങിയ മേഖലകളില്‍ ഒന്നിച്ചുള്ള പ്രവര്‍ത്തനം ഉറപ്പുവരുത്തുന്നതിനും ചര്‍ച്ചയില്‍ ധാരണയായി.