നാസിക്: വീരമൃത്യുവരിച്ച ജവാന്മാരോടും രാജ്യത്തോടുമുള്ള സ്‌നേഹം സമൂഹ മാധ്യമങ്ങളിലൂടെയല്ല വിളിച്ചുകൂവേണ്ടതെന്ന് സൈബര്‍ പോരാളികളോട് കശ്മിരിലെ ബുര്‍ദ്ഗാമില്‍ വീരമൃത്യു വരിച്ച നിനാദ് മന്ദേവാഗ്നയുടെ ഭാര്യ വിജേത. വ്യോമസേന ഹെലികോപ്റ്റര്‍ തകര്‍ന്നാണ് നിനാദ് ഉള്‍പ്പെടെ അഞ്ചുപേര്‍ വീരമൃത്യു വരിച്ചത്.

സമൂഹമാധ്യമങ്ങളില്‍ പാകിസ്താനുമായി യുദ്ധത്തിന് മുറവിളി കൂട്ടുന്നവര്‍ ദയവായി അത് നിര്‍ത്തണം.
പാകിസ്താനെതിരേ മൂര്‍ദാബാദ് വിളിക്കുകയും ഇന്ത്യക്കനുകൂലമായി സിന്ദാബാദ് വിളിക്കുകയുമല്ല വേണ്ടത്. ഇതൊന്നും ഒരു മാറ്റവും കൊണ്ടുവരില്ല. അതിന് പകരം നിങ്ങള്‍ക്ക് എന്തെങ്കിലും ചെയ്യാന്‍ കഴിയുമെങ്കില്‍ അത് സൈന്യത്തില്‍ ചേരുകയെന്നതാണ്. അതിന് കഴിയുന്നില്ലെങ്കില്‍ കുടുംബത്തിലുള്ളവരെ പ്രേരിപ്പിക്കണം. അതിനൊന്നും ആവുന്നില്ലെങ്കില്‍ സ്ത്രീകളെ അപമാനിക്കാതിരിക്കുക, വര്‍ഗീയ വിദ്വേഷം പരത്താതിരിക്കുക തുടങ്ങിയവയെങ്കിലും ചെയ്യണമെന്നും വിജേത പറയുന്നു.

കഴിഞ്ഞ ബുധനാഴ്ച കശ്മിരിലെ ബുര്‍ദ്ഗാമില്‍ സൈനികരെ കൊണ്ടുപോയ വ്യോമസേനയുടെ എം.ഐ 17 വി 5 സേനാ ഹെലികോപ്റ്റര്‍ തകര്‍ന്നാണ് സ്‌ക്വാഡ്രന്‍ ലീഡര്‍ നിനാദ് മരിച്ചത്.