കൊണ്ടോട്ടി:എട്ടു വര്‍ഷമായി തകര്‍ന്നടിഞ്ഞ് കിടക്കുന്ന കൊണ്ടോട്ടി-എടവണ്ണപ്പാറ റോഡ് അടിയന്തരമായി നവീകരിക്കാന്‍ 2.2 കോടി രൂപയുടെ ഭരണാനുമതി. ടി.വി ഇബ്രാഹീം എം.എല്‍.എയുടെ ശ്രമഫലമായാണ് റോഡിന് ഫണ്ട് അനുവദിച്ചത്.
ചീക്കോട് കുടിവെള്ള പദ്ധതിയുടെ പൈപ്പുകള്‍ സ്ഥാപിക്കാനായാണ് റോഡ് വെട്ടിപ്പൊളിച്ചത്.എന്നാല്‍ എട്ടുവര്‍ഷമായി റോഡ് പുനരുദ്ധാരണം നടത്താനായിരുന്നില്ല.നൂറുകണക്കിന് വാഹനങ്ങള്‍ ദിനേന പോകുന്ന റോഡ് പലയിടങ്ങളിലും തകര്‍ന്ന് കിടക്കുകയാണ്.
നിരവധി അപകടങ്ങളുമുണ്ടായി. ഇരുചക്രവാഹനങ്ങള്‍ അപകടത്തില്‍ പെടുന്നതും പതിവായിരുന്നു.നിരവധി തവണ ഇതുസംബന്ധിച്ച് പരാതി നല്‍കിയിരുന്നെങ്കിലും സാങ്കേതികത്വം പറഞ്ഞ് അധികൃതര്‍ അവഗണിക്കുകയായിരുന്നു. റോഡ് നവീകരണം ആവശ്യപ്പെട്ട് മാസങ്ങള്‍ക്ക് മുന്‍പ് നാട്ടുകാര്‍ ബഹുജന മാര്‍ച്ചും സംഘടിപ്പിച്ചിരുന്നു.