ടെല്‍അവീവ്: ഇസ്‌റാഈലില്‍ മുന്‍ പ്രധാനമന്ത്രി ബെന്യാമിന്‍ നെതന്യാഹുവും തെരഞ്ഞെടുപ്പിലെ അദ്ദേഹത്തിന്റെ എതിരാളി ബെന്നി ഗാന്റ്‌സും ചേര്‍ന്നുള്ള സഖ്യസര്‍ക്കാരിന് സുപ്രിം കോടതിയുടെ അനുമതി. സഖ്യസര്‍ക്കാരിനെതിരേ രാജ്യവ്യാപക പ്രതിഷേധം നടക്കുന്നതിനിടെയാണ് സുപ്രിം കോടതിയുടെ നിര്‍ണായക വിധി.
തെരഞ്ഞെടുപ്പില്‍ ആര്‍ക്കും ഭരിക്കാനുള്ള ഭൂരിപക്ഷം ലഭിക്കാത്തതിനെ തുടര്‍ന്ന് ഇസ്‌റാഈലില്‍ സര്‍ക്കാര്‍ രൂപീകരണം അനിശ്ചിതത്വത്തിലായിരുന്നു. തുടര്‍ന്നായിരുന്നു തെരഞ്ഞെടുപ്പില്‍ മുഖ്യ എതിരാളികളായി മത്സരിച്ച ഇരുവരും സഖ്യസര്‍ക്കാര്‍ രൂപീകരണത്തിനായി കരാറില്‍ ഒപ്പിട്ടത്. ഇരുവരും നിശ്ചിത കാലയളവില്‍ പ്രധാനമന്ത്രി സ്ഥാനം പങ്കിടുന്നതടക്കമുള്ളതായിരുന്നു കരാര്‍. ഇതിനെതിരേ സുപ്രിം കോടതിയില്‍ നിരവധി ഹരജികളാണ് സമര്‍പ്പിക്കപ്പെട്ടിരുന്നത്.
ഇത്തരത്തിലുള്ള സഖ്യസര്‍ക്കാര്‍ നിയമവിരുദ്ധമാണെന്നായിരുന്നു അധിക ഹരജികളിലും ആരോപിച്ചിരുന്നത്. ഹരജി കോടതി പരിഗണിക്കാന്‍ തുടങ്ങിയ ദിവസം കോടതിക്കു പുറത്തുവരെ ശക്തമായ പ്രതിഷേധങ്ങള്‍ നടന്നിരുന്നു. ദിവസങ്ങള്‍ നീണ്ട വാദങ്ങള്‍ക്കു ശേഷമാണ് ഇക്കാര്യത്തില്‍ കോടതി വിധി പറഞ്ഞത്. സഖ്യസര്‍ക്കാര്‍ രൂപീകരണത്തില്‍ നിയമപരമല്ലാത്തതായി ഒന്നും കാണുന്നില്ലെന്നായിരുന്നു കോടതിയുടെ പ്രതികരണം.
ഇതോടെ, സഖ്യസര്‍ക്കാരിന്റെ സത്യപ്രതിജ്ഞ ഈ മാസം 13ന് നടക്കും. നെതന്യാഹുവിന്റെ ലിക്യുഡ് പാര്‍ട്ടിയും ഗാന്റ്‌സിന്റെ ബ്ലൂ ആന്‍ഡ് വൈറ്റ് പാര്‍ട്ടിയുമാണ് ഇക്കാര്യം അറിയിച്ചത്. ആദ്യ 18 മാസം നെതന്യാഹുവും തുടര്‍ന്നുള്ള സമയം ബെന്നി ഗാന്റ്‌സുമായിരിക്കും ഇസ്‌റാഈലിന്റെ പ്രധാനമന്ത്രി സ്ഥാനം വഹിക്കുക.