പാലക്കാട് : സംസ്ഥാനത്ത് പൊലിസ് സേന ഉള്‍പ്പെടെ സമസ് തമേഖലകളെയും സി.പി.എം പാര്‍ട്ടിവത്കരിച്ചിരിക്കുകയാണെന്ന് ബി.ജെ.പി അഖിലേന്ത്യ ജനറല്‍ സെക്രട്ടറി പി. മുരളീധര്‍റാവു പത്രസമ്മേളത്തില്‍ കുറ്റപ്പെടുത്തി.
പാര്‍ട്ടിയും പൊലിസും ഒത്തുകളിക്കുകയാണ്. ക്രിമിനലുകളെ ഇല്ലാതാക്കുന്നതിന് പകരം അവരെ സംരക്ഷിക്കുകയും വളര്‍ത്തുകയും ചെയ്യുന്ന നയാമാണ് സി.പി.എം കൈകൊള്ളുന്നത്.
കേരളത്തില്‍ സി.പി.എമ്മിന്റെ അവസാന ഭരണമായിരിക്കുമിത്. അധികാരമേറ്റ് പത്തു മാസം പിന്നിടുമ്പോഴേക്കും സംസ്ഥാനത്ത് ക്രമസമാധാമ നില തകര്‍ന്നു. ഇതിനെതിരേ കേന്ദ്രത്തിന്റെ ഭാഗത്തുനിന്നും ശക്തമായ നടപടി ഉണ്ടാകും.
സ്ത്രികള്‍ക്ക് സംസ്ഥാന തലസ്ഥാനത്തു പോലും സുരക്ഷയില്ലാത്തതിന് ഉദാഹരണമാണ് കഴിഞ്ഞ ദിവസം നടന്ന സംഭവങ്ങള്‍ അദ്ദേഹം പറഞ്ഞു.
ജനങ്ങള്‍ക്കായി തൊണ്ണൂറിലധികം പദ്ധതികളാണ് മോദി സര്‍ക്കാര്‍ മൂന്നു വര്‍ഷത്തിനിടെ ആവിഷ്‌കരിച്ചത്. നോട്ട് നിരോധനം തെരഞ്ഞെടുപ്പില്‍ ബി.ജെ.പിയെ ബാധിക്കുമെന്ന് പറഞ്ഞതിനുള്ള ചുട്ട മറുപടിയാണ് അഞ്ച് സംസ്ഥാനങ്ങളിലെ തെരഞ്ഞെടുപ്പ് വിജയം.
കക്ഷിരാഷ്ട്രീയത്തിനതീതമായി രാജ്യത്തെ എല്ലാ സംസ്ഥാന സര്‍ക്കാരുകളോടും ഒരേ സമീപനമാണ് മോദി സര്‍ക്കാരിനുള്ളത്. മത്സരിക്കുക, പൊരുതുക നേടുക ഇതാണ് ബി.ജെ.പിയുടെ ലക്ഷ്യം.
കേരളമുള്‍പ്പെടെ ബി.ജെ.പി ദുര്‍ബലമായ സംസ്ഥാനങ്ങളില്‍ ശ്രദ്ധ കേന്ദ്രീകരിക്കും ഇതിന്റെ ഭാഗമായി മന്ത്രിമാരും, എം.പിമാരും ഉള്‍പ്പെടെയുള്ള മുതിര്‍ന്ന നേതാക്കളെ നിയോഗിച്ചു കഴിഞ്ഞു.
സി.പി.എമ്മിന് ബദലാകാന്‍ കോണ്‍ഗ്രസിന് കഴിയില്ല. ഇരുവരും വോട്ടുബാങ്ക് രാഷ്ട്രീയമാണ് കളിക്കുന്നത് ഇതിനെതിരേ ജനങ്ങള്‍ പ്രതികരിച്ചതിന്റെ തെളിവാണ് ബി.ജെ.പിക്കുണ്ടായ വിജയം.
കേരളത്തിന്റെ വികസനത്തിന് ആവശ്യമായ അടിസ്ഥാന സൗകര്യത്തിന് കേന്ദ്രം ഊന്നല്‍ നല്‍കുമെന്ന് അദ്ദേഹം വ്യക്തമാക്കി.
ജന.സെക്രട്ടറി ശോഭാ സുരേന്ദ്രന്‍, സെക്രട്ടറി സി. കൃഷ്ണകുമാര്‍, മേഖല പ്രസിഡന്റ് അഡ്വ. നാരായണന്‍ നമ്പൂതിരി, ജില്ലാ പ്രസിഡന്റ് അഡ്വ. ഇ. കൃഷ്ണദാസ് പങ്കെടുത്തു.