കോതമംഗലം: ദമാമില്‍ കഴിഞ്ഞ ആറ് വര്‍ഷക്കാലമായി കുടുങ്ങി കിടക്കുകയായിരുന്ന ആലിക്കുട്ടി നാട്ടില്‍ തിരിച്ചെത്തി.പല്ലാരിമംഗലം കൂവള്ളൂര്‍ പള്ളിക്കര വീട്ടില്‍ ആലിക്കുട്ടിയാണ് ശനിയാഴ്ച്ച രാത്രി നാടണഞ്ഞത്.
സുപ്പര്‍ മാര്‍ക്കറ്റ് ഏറ്റെടുത്ത് നടത്തിയതുമായി ബന്ധപ്പെട്ട് സുഹൃത്തുക്കള്‍ ചതിച്ചതാണ് നാട് കാണാന്‍ കഴിയാതെ ദമാമില്‍ കുടുങ്ങാന്‍ ഇടയാക്കിയത്. സൂപ്പര്‍ മാര്‍ക്കറ്റ് പൊലിസിന് മറിച്ചു നല്‍കിയ മലയാളി കടയുടമയായ അറബിക്ക് ലക്ഷങ്ങള്‍ നല്‍കാന്‍ ബാധ്യത നില്‍ക്കെയാണ് കട കൈമാറിയത്. ഇത് ആലി കുട്ടിയോ സുഹൃത്തുക്കളോ അറിഞ്ഞിരുന്നില്ല. ഒരു ചെറിയ കുട്ടി കടയിലെത്തി ദിവസവും വിലപിടിച്ച വസ്തുക്കള്‍ എടുത്ത് കൊണ്ട് പോകുന്നത് ശ്രദ്ധയില്‍പ്പെടുകയും ഒരു ദിവസം കുട്ടിയെ തടഞ്ഞു നിര്‍ത്തി പണം നല്‍കിയിട്ട് പോയാല്‍ മതി എന്ന്പറഞ്ഞതോടെ ഉടമസ്ഥനായ അറബി രംഗത്ത് വരികയും തനിക്ക് ലക്ഷങ്ങള്‍ നല്‍കാനുണ്ടെന്നും അറിയിക്കുന്നത്.
കരാര്‍ എഴുതിയിരുന്നത് ആലി കുട്ടിയുടെ പേരിലായതിനാല്‍ തനിക്ക് കിട്ടാനുള്ള പണം തിരിച്ചു കിട്ടുന്നത് വരെ ആലി കുട്ടി മറ്റൊരിടത്ത് പണിക്ക് നിര്‍ത്തുകയും ശബളം അറബി കൈപ്പറ്റുകയുമാണ് ചെയ്തു വരുന്നതെന്നാണ് വീട്ടുകാരോടും സുഹൃത്തുക്കളോടും ആലിക്കുട്ടി പറഞ്ഞിരിക്കുന്നത്.
വാര്‍ത്ത പുറത്ത് വന്നതോടെ വിവിധ സന്നദ്ധ സംഘടനകള്‍ ആലിക്കുട്ടിയുമായി ബന്ധപ്പെട്ടിരുന്നു. പ്രശ്‌നങ്ങളെ എങ്ങിനെ നേരിടണമെന്ന് അറിയാത്ത ആലിക്കുട്ടിക്ക് പല്ലാരിക്കൂട്ടം എന്ന പല്ലാരിമംഗലത്തെ പ്രവാസി സംഘടന സര്‍വ്വ പിന്തുണയും വാഗ്ദാനം ചെയ്യുകയും നഷ്ടപരിഹാര തുക നല്‍കി വിടുതലിന് വഴിതുറക്കുകയുമായിരുന്നു.
ശനിയാഴ്ച്ച പുലര്‍ച്ചെ സൗദിയില്‍ നിന്നും മൂബൈ വഴി രാത്രി ഏട്ടോടെ നെടുമ്പാശേരിയിലെത്തി.രാത്രി 9.30 വീട്ടിലെത്തിയതോടെ കഴിഞ്ഞ ആറ് വര്‍ഷമായി കാത്തിരിക്കുന്ന ഭാര്യ ഷൈലയുടെയും മകള്‍ ഒന്‍പതു വയസുകാരി സല്‍മ്മ ഫര്‍സാനയുടെയും കാത്തിരിപ്പിന് ഇതോടെ വിരാമമായി.