ജിദ്ദ: കിഴക്കന്‍ പ്രവിശ്യയിലെ നാടുകടത്തല്‍ കേന്ദ്രത്തിലെ മുഴുവന്‍ വിദേശികളെയും ഉടന്‍ മക്കയിലെ ശുമൈസി ജയിലിലേക്ക് മാറ്റാന്‍ പദ്ധതി. സഊദി ജയില്‍ അതോറിറ്റി മേധാവി മേജര്‍ ജനറല്‍ മുഹമ്മദ് അല്‍അസ്മരി അറിയിച്ചതാണ് ഇക്കാര്യം. കിഴക്കന്‍ പ്രവിശ്യയിലെ സഊദി തടവുകാരെ ദമാം, അല്‍കോബാര്‍ ജയിലുകളിലേക്ക് മാറ്റാനും തീരുമാനിച്ചു. കൂടാതെ, സാമ്പത്തിക ബാധ്യത കാരണം തടവില്‍ കഴിയുന്നവരെ 'ബിസിനസ് സെന്റേഴ്‌സ്' എന്ന പേരില്‍ പ്രത്യേകം സെല്ലുകളിലേക്ക് മാറ്റുമെന്നും അദ്ദേഹം വ്യക്തമാക്കി.

വന്‍ സാമ്പത്തിക ബാധ്യത കാരണം തടവില്‍ കഴിയുന്ന വ്യവസായികളെ ഇതര കുറ്റവാളികളില്‍നിന്ന് വേര്‍തിരിക്കും. ഇവരുടെ സെല്ലുകളില്‍ ടെലിഫോണ്‍, മൊബൈല്‍, ഇന്റര്‍നെറ്റ് മുതലായവ ഉപയോഗിക്കാന്‍ സൗകര്യങ്ങള്‍ ഏര്‍പ്പെടുത്തും. തടവുകാര്‍ക്ക് തങ്ങളുടെ വ്യാപാരം നിയന്ത്രിക്കുന്നതിനും നടത്തുന്നതിനും സൗകര്യം നല്‍കുന്നതിന്റെ ഭാഗമായാണ് തീരുമാനം. ഇവരുടെ ബാധ്യത വീട്ടുന്നതിന് ഫുര്‍ജത് പദ്ധതിയും ആവിഷ്‌കരിച്ചിട്ടുണ്ടെന്ന് സഊദി ജയില്‍ മേധാവി പറഞ്ഞു. ഇതിന് പുറമെ, തടവുകാരുടെ ക്ഷേമം മുന്‍നിര്‍ത്തി, അവരുടെ ആവശ്യങ്ങളും പരാതികളും ജയില്‍ അധികൃതരെ അറിയിക്കുന്നതിനും നിരവധി പദ്ധതികള്‍ ആരംഭിച്ചിട്ടുണ്ടെന്നും അദ്ദേഹം പറഞ്ഞു.
നിലവില്‍ വാടകക്കെട്ടിടത്തില്‍ പ്രവര്‍ത്തിക്കുന്ന ജയിലുകള്‍ രണ്ട് വര്‍ഷത്തിനകം അടച്ചുപൂട്ടുമെന്നും മേജര്‍ ജനറല്‍ മുഹമ്മദ് അല്‍അസ്മരി അറിയിച്ചു. ഈ കെട്ടിടങ്ങളെല്ലാം ഗവണ്‍മെന്റ് ഏറ്റെടുക്കാനും നീക്കമുണ്ട്.

നാല് പ്രവിശ്യകളില്‍ വീഡിയോ കോണ്‍ഫറന്‍സ് വഴി വിചാരണ നടത്തുന്നതിനുള്ള കേന്ദ്രങ്ങള്‍ സ്ഥാപിച്ചതായി അദ്ദേഹം സൂചിപ്പിച്ചു. ഇവ വൈകാതെ നീതിന്യായ മന്ത്രാലയവുമായി ബന്ധിപ്പിക്കും. പബ്ലിക് പ്രോസിക്യൂഷന്‍, ഗവര്‍ണറേറ്റുകള്‍, നീതിന്യായ മന്ത്രാലയം തുടങ്ങിയ ബന്ധപ്പെട്ട ഗവണ്‍മെന്റ് വകുപ്പുകളുമായി സഊദി ജയിലുകളെ ബന്ധിപ്പിക്കുന്നതിന് യൂസര്‍ പ്രോഗ്രാമും വികസിപ്പിച്ചിട്ടുണ്ട്. വൈകാതെ, തടവുകാര്‍ക്കായി നിരവധി ഫാക്ടറികള്‍ തുറക്കുമെന്നും ജയില്‍ മേധാവി വ്യക്തമാക്കി.