കണ്ണൂര്‍: കണ്ണൂര്‍ ചാലക്കുന്നില്‍ റെയില്‍വെ ട്രാക്കിനോട് ചേര്‍ന്നുള്ള റെയില്‍വെ പുറമ്പോക്കിലെ അക്വേഷ്യ കാടിന് തീപടര്‍ന്നു പിടിച്ചു. ഞായറാഴ്ച വൈകീട്ട് നാല് മണിയോടെയാണ് അക്വേഷ്യ മരങ്ങള്‍ക്കിടയിലുള്ള കുറ്റിക്കാടുകള്‍ക്ക് തീപടര്‍ന്നുപിടിച്ചത്. വിവരമറിഞ്ഞ് കണ്ണൂരില്‍ നിന്നുള്ള രണ്ട് യൂനിറ്റ് ഫയര്‍ സര്‍വിസ് വാഹനങ്ങളെത്തിയാണ് തീയണച്ചത്. തീയണച്ചശേഷം ഒരു അക്വേഷ്യ മരത്തിന് കീഴിലായി തലയോട്ടിയും എല്ലുകളും കണ്ടെത്തിയതോടെ ഫയര്‍ഫോഴ്‌സ് അധികൃതര്‍ വിവരം പൊലിസിനെ അറിയിച്ചു.
എടക്കാട് പൊലിസ് സ്ഥലത്തെത്തി തലയോട്ടിയും എല്ലുകളും ശേഖരിച്ച് വിദഗ്ധ അന്വേഷണത്തിനായി പരിയാരം മെഡിക്കല്‍ കോളജിലേക്ക് മാറ്റി. തലയോട്ടി കണ്ടെത്തിയ അക്വേഷ്യ മരത്തില്‍ ബെഡ്ഷീറ്റ് കെട്ടിയ നിലയിലും കണ്ടെത്തിയിരുന്നു. വര്‍ഷങ്ങള്‍ക്ക് മുമ്പ് തൂങ്ങി മരിച്ചയാളുടെതായിരിക്കാം തലയോട്ടിയും എല്ലുകളുമെന്നാണ് പൊലിസിന്റെ പ്രാഥമിക നിഗമനം. അന്വേഷണം ആരംഭിച്ചതായി എടക്കാട് പൊലിസ് അറിയിച്ചു.