മുക്കം: സംസ്ഥാനത്ത് വേനല്‍ കടുത്തതോടെ രൂക്ഷമായ കുടിവെള്ള ക്ഷാമം അനുഭവപ്പെടുന്ന പ്രദേശങ്ങളില്‍ കുടിവെള്ളം വിതരണം ചെയ്യാന്‍ തദ്ദേശ സ്വയംഭരണ സ്ഥാപനങ്ങള്‍ക്ക് സര്‍ക്കാര്‍ അനുമതി നല്‍കി. കുടിവെള്ളം വിതരണം ചെയ്യുന്നതിന് ആവശ്യമായ നടപടികള്‍ സ്വീകരിക്കുവാന്‍ തനത് പ്ലാന്‍ ഫണ്ടില്‍നിന്നും തുക വിനിയോഗിക്കാനാണ് അനുമതി നല്‍കിയത്. ഇതുപ്രകാരം മാര്‍ച്ച് 31വരെ ഗ്രാമ പഞ്ചായത്തുകള്‍ക്ക് 5.50 ലക്ഷം രൂപയും മുനിസിപ്പാലിറ്റികള്‍ക്ക് 11 ലക്ഷം രൂപയും കോര്‍പ്പറേഷനുകള്‍ക്ക് 16. 50 ലക്ഷം രൂപയും ചെലവഴിക്കാം. എന്നാല്‍ നിശ്ചയിച്ചിട്ടുള്ള പരമാവധി തുക അധികരിക്കുന്ന രീതിയിലുള്ള കുടിവെള്ള വിതരണ പ്രവര്‍ത്തനങ്ങള്‍ ഏറ്റെടുക്കരുതെന്ന് സര്‍ക്കാര്‍ മുന്നറിയിപ്പ് നല്‍കിയിട്ടുണ്ട്.
ഏപ്രില്‍ ഒന്നുമുതല്‍ മെയ് 31വരെ കുടിവെള്ള വിതരണത്തിനായി ഗ്രാമ പഞ്ചായത്തുകള്‍ക്ക് 11 ലക്ഷം രൂപയും മുനിസിപ്പാലിറ്റികള്‍ക്ക് 16.50 ലക്ഷം രൂപയും കോര്‍പ്പറേഷനുകള്‍ക്ക് 22 ലക്ഷം രൂപയും ചെലവഴിക്കാം. തദ്ദേശ സ്ഥാപനങ്ങള്‍ക്ക് കീഴില്‍ കുടിവെള്ളം വിതരണം ചെയ്യുന്ന ടാങ്കര്‍ വാഹനങ്ങള്‍ക്ക് ജി.പി.എസ് (ഗ്ലോബല്‍ പൊസിഷനിങ് സിസ്റ്റം)ഘടിപ്പിക്കണമെന്നും നിര്‍ദേശമുണ്ട്.
വിതരണം ചെയ്യുന്ന കുടിവെള്ളത്തിന്റെ ഗുണനിലവാരം ഉറപ്പുവരുത്തി ജനങ്ങള്‍ക്ക് സൗകര്യപ്രദമായ സമയത്ത് ആവശ്യത്തിന് അനുസൃതമായി ജി.പി.എസ് ഘടിപ്പിച്ച ടാങ്കറുകളില്‍ കുടിവെള്ളം വിതരണം നടത്തണം. ദുരന്തനിവാരണ വകുപ്പ് മുഖേന സ്ഥാപിച്ചിട്ടുള്ള വാട്ടര്‍ കിയോസ്‌കുകള്‍ വഴിയും അനുവദിച്ച ഫണ്ട് ഉപയോഗിച്ച് തദ്ദേശ സ്ഥാപനങ്ങള്‍ക്ക് കുടിവെള്ള വിതരണം നടത്താം. ജില്ലാതല റവന്യൂ ഉദ്യോഗസ്ഥര്‍ കുടിവെള്ള വിതരണം സംബന്ധിച്ച് മോണിറ്ററിങ് നടത്തും. ജി.പി.എസ് ലോഗും വാഹനത്തിന്റെ ലോഗ് ബുക്കും ക്രോസ് ചെയ്ത് വിതരണത്തിലെ സുതാര്യത ഉറപ്പുവരുത്തും. ഓരോ ജില്ലയിലെയും കുടിവെള്ള വിതരണം സംബന്ധിച്ച് ജില്ലാതല തദ്ദേശ വകുപ്പ് മേധാവികള്‍ ഓരോ രണ്ടാഴ്ചയിലും കലക്ടര്‍ക്ക് റിപ്പോര്‍ട്ട് നല്‍കണം.