തിരുവനന്തപുരം: കൊവിഡ് പശ്ചാത്തലത്തില്‍ സാമ്പത്തിക പ്രതിസന്ധിയിലായ സംസ്ഥാന സര്‍ക്കാരിന് സാമ്പത്തിക വര്‍ഷത്തിന്റെ ആദ്യം തന്നെ നിരന്തരം കടമെടുക്കാതെ നിര്‍വാഹകമില്ല.
നികുതി വരുമാനം നിലക്കുകയും കേന്ദ്ര സഹായം പ്രഖ്യാപിക്കാതിരിക്കുകയും ചെയ്യുന്നതോടെ തുടര്‍ച്ചയായി വായ്പ എടുക്കേണ്ട അവസ്ഥയിലേക്ക് സംസ്ഥാനം മാറി. ഒന്നര മാസത്തിനിടയില്‍ സര്‍ക്കാര്‍ മൂന്നാം തവണയും കടമെടുക്കുകയാണ്. ഏപ്രില്‍ അഞ്ചിന് ആയിരം കോടി രൂപ കടമെടുത്ത കേരളം, ഇന്ന് 500 കോടി രൂപയുടെ കടപ്പത്രംകൂടി ലേലത്തിന് വച്ചിരിക്കുകയാണ്.
കഴിഞ്ഞ മാസം 5930 കോടി രൂപ വായ്പയെടുത്തതിന് പിന്നാലെയാണ് പ്രതിസന്ധി കടുത്തതോടെ വീണ്ടും കടമെടുക്കുന്നത്. കേന്ദ്ര സര്‍ക്കാര്‍ സംസ്ഥാനത്തെ സഹായിക്കാന്‍ തയാറാകുന്നില്ലെങ്കില്‍ കടം എടുക്കുന്നതിന്റെ പരിധിയെങ്കിലും കൂട്ടണമെന്നാണ് ധനമന്ത്രി തോമസ് ഐസക്ക് ആവശ്യപ്പെടുന്നത്. എന്നാല്‍ ജി.ഡി.പി യുടെ മൂന്ന് ശതമാനമാണ് വായ്പാ പരിധി. ഇത് അഞ്ച് ശതമാനമാക്കണമെന്നാണ് സംസ്ഥാനത്തിന്റെ ആവശ്യം. നികുതി വരുമാനങ്ങള്‍ നിലച്ചതോടെ ശമ്പളം നല്‍കാനും സര്‍ക്കാരിന്റെ ദൈനംദിന കാര്യങ്ങള്‍ക്കും വായ്പ എടുക്കേണ്ട അവസ്ഥയാണ്.
സാമ്പത്തിക വര്‍ഷത്തിന്റെ ആദ്യ പാദത്തില്‍ തന്നെ വലിയ തോതില്‍ കടം എടുക്കുന്നതോടെ തുടര്‍ന്നുള്ള പാദങ്ങളില്‍ പ്രതിസന്ധി രൂക്ഷമാകുമെന്നാന്ന് സാമ്പത്തിക വിദഗ്ധര്‍ ചൂണ്ടി കാട്ടുന്നത്. സംസ്ഥാനത്തിന്റെ പൊതുകടം ഇടതു സര്‍ക്കാരിന്റെ അവസാന വര്‍ഷം വര്‍ധിക്കുന്ന സാഹചര്യമാണ്. യു.ഡി.എഫ് സര്‍ക്കാരിന്റെ കാലത്ത് ഒന്നര ലക്ഷം കോടിയുണ്ടായിരുന്ന പൊതുകടം ഇപ്പോള്‍ 2.65 ലക്ഷം കോടിയിലെത്തി നില്‍ക്കുകയാണ്. 2018 - 19 സാമ്പത്തിക വര്‍ഷം 15249.92 കോടി രൂപയാണ് പൊതുകടം എടുത്തത്. 2019-2025 കാലയളവില്‍ വിവിധ കടബാധ്യത ഇനത്തില്‍ സംസ്ഥാനം കൊടുത്ത് തീര്‍ക്കാനുള്ളത് 64718. 13 കോടി രൂപയാണ്. ഇത് പൊതു കടത്തിന്റെ 37.69 ശതമാനമാണ്. സംസ്ഥാനത്തിന്റെ റവന്യു വരുമാനത്തില്‍ വലിയ കുറവാണ് ലോക്ക് ഔട്ടിലൂടെ ഉണ്ടായിരിക്കുന്നത്. എന്നാല്‍ കൊവിഡ് പ്രതിരോധ പ്രവര്‍ത്തനങ്ങള്‍ കൂടി വന്നതോടെ ചിലവ് വര്‍ധിച്ചു.
2019. 20 വര്‍ഷത്തില്‍ ജനുവരി മാസം വരെയുള്ള കണക്ക് പ്രകാരം 43 184.97 കോടി രൂപയാണ് ശമ്പളവും പെന്‍ഷനുമായി ചിലവഴിച്ചത്. അതായത് റവന്യു വരുമാനത്തിന്റെ 61.50 ശതമാനം ഇതിനായി നീക്കിവെയ്ക്കണം.
ലോക്ക് ഡൗണിലായ ഏപ്രില്‍ മാസത്തില്‍ വലിയ വരുമാന നഷ്ടമാണ് സര്‍ക്കാരിന് നേരിട്ടത്. 250 കോടിയോളം രൂപ മാത്രമാണ് നികുതി ഇനത്തില്‍ ലഭിച്ചത്.ഏറ്റവും കൂടുതല്‍ നികുതി വരുമാനം മദ്യവില്‍പനയിലും ഇന്ധനനികുതിയിലുമാണ്. മദ്യവില്‍പന നിര്‍ത്തിയതോടെ കഴിഞ്ഞ 45 ദിവസം കൊണ്ട് 1657 കോടി രൂപയാണ് ഖജനാവിന് നഷ്ടമായത്. ശരാശരി പ്രതിമാസം 900 കോടി ലഭിച്ചിരുന്ന ഇന്ധന നികുതി വാഹനങ്ങള്‍ നിരത്തിലിറങ്ങാതായതോടെ 100 കോടിക്ക് താഴെയായി. വ്യാപാര മേഖല സ്തംഭിച്ചതോടെ ജി.എസ്.ടി ഉള്‍പ്പടെ മറ്റു വരുമാനങ്ങളും നിലച്ചു. സര്‍ക്കാരിന്റെ സാമ്പത്തിക പ്രതിസന്ധി കൊവിഡിന് മുന്‍പുള്ളതാണെന്നും ഇപ്പോള്‍ ധനമന്ത്രി കൊ വിഡിന്റെ മേല്‍ മുഴുവന്‍ പ്രതിസന്ധിയുടെയും ഉത്തരവാദിത്വം കെട്ടിവയ്ക്കുകയാണെന്നുമാണ് പ്രതിപക്ഷം ചൂണ്ടിക്കാട്ടുന്നത്.
ഇപ്പോഴത്തെ സാഹചര്യത്തില്‍ സര്‍ക്കാരിന് കടമെടുക്കാതിരിക്കാന്‍ കഴിയില്ലെന്നും എന്നാല്‍ സര്‍ക്കാര്‍ നേരത്തെ തന്നെ നല്‍കേണ്ട കുടിശികകള്‍ മാത്രമാണ് ഇപ്പോള്‍ പാക്കേജിലൂടെ നല്‍കിയതെന്നുമാണ് കോണ്‍ഗ്രസ് നേതാവ് വി.ഡി. സതീശന്‍ ചൂണ്ടി ക്കാട്ടുന്നത്.