തിരുവനന്തപുരം: സംസ്ഥാന സര്‍ക്കാരിന്റെ പ്രവര്‍ത്തന ശൈലി ശരിയല്ലെന്നും കേന്ദ്രമാനദണ്ഡങ്ങള്‍ കേരളം പാലിക്കുന്നില്ലെന്നുമുള്ള കേന്ദ്രവിദേശ കാര്യസഹമന്ത്രി വി. മുരളീധരന്റെ വിമര്‍ശനത്തിന് മറുപടിയുമായി മന്ത്രി ജെ. മേഴ്സിക്കുട്ടിയമ്മ.

ഓരോരുത്തരേയും കൃത്യമായി ക്വാറന്റൈന്‍ ചെയ്യാന്‍ കഴിയുന്ന തരത്തില്‍ മുന്നൊരുക്കത്തോടെയാണ് സംസ്ഥാനം കാര്യങ്ങള്‍ ചെയ്യുന്നത്. രണ്ടുലക്ഷം ആളുകളെ സ്വീകരിക്കാന്‍ തയ്യാറാണെന്ന് പറഞ്ഞാല്‍ രണ്ട് ലക്ഷം ആളുകളെ ഒന്നിച്ച് കൊണ്ടുവന്ന് ഇവിടെ ഇടുകയാണോ വേണ്ടത്. ഓരോരുത്തരേയും ക്വാറന്റൈന്‍ ചെയ്യാന്‍ സാധിക്കണം. മുരളീധരനെപ്പോലെയുള്ള ആളുകള്‍ ഉത്തരവാദിത്തതോടെ പ്രതികരിക്കേണ്ട ഒരു പ്രശ്നമാണ് ഇത്. കേരളത്തെ മഹാരാഷ്ട്രയോ ഗുജറാത്തോ ആക്കാനാണോ മുരളീധരന് തിടുക്കമെന്നും അവര്‍ ചോദിച്ചു.

ജാഗ്രതയോടെയുള്ള നമ്മുടെ ഈ പ്രവര്‍ത്തനം കൊണ്ടാണ് ലോകത്തിന് മാതൃകയായി കേരളം നില്‍ക്കുന്നത്. തികഞ്ഞ ജാഗ്രതയോടെ സംസ്ഥാനം ചെയ്യുന്ന കാര്യത്തില്‍ ഏതിലാണ് മുരളീധരന് പരാതിയുള്ളതെന്നും അവര്‍ കൂട്ടിച്ചേര്‍ത്തു. ക്വാറന്റൈന്‍ സൗകര്യം ഒരുക്കാന്‍ തയ്യാറാണ്. എന്നാല്‍ അത്തരത്തില്‍ അറിയിച്ചിട്ട് വേണം കൊണ്ടുവരാന്‍. പ്രളയകാലത്ത് ചെയ്ത പോലെ ഇപ്പോള്‍ ചെയ്യാന്‍ കഴിയില്ലെന്നും അവര്‍ വ്യക്തമാക്കി.