വാഷിങ്ടണ്‍: ലോകത്ത് കൊവിഡ് മഹാമാരി ഭീതി വിതയ്ക്കുമ്പോഴും ഇന്ത്യയില്‍ ജനാധിപത്യ, ന്യൂനപക്ഷ അവകാശങ്ങള്‍ ലംഘിക്കപ്പെടുന്നെന്ന വിമര്‍ശനവുമായി യു.എസ് കമ്മിഷന്‍. യു.എസ് കമ്മിഷന്‍ ഫോര്‍ ഇന്റര്‍നാഷനല്‍ റിലീജ്യസ് ഫ്രീഡമാണ് കേന്ദ്രസര്‍ക്കാരിനെതിരേ രൂക്ഷ വിമര്‍ശനവുമായി രംഗത്തെത്തിയിരിക്കുന്നത്.

ഇന്ത്യയിലെ ന്യൂനപക്ഷങ്ങളെ ബാധിക്കുന്ന പൗരത്വ നിയമ ഭേദഗതിക്കെതിരേ പ്രതിഷേധിച്ച ഗര്‍ഭിണി അടക്കമുള്ളവരെ അറസ്റ്റ് ചെയ്ത നടപടിക്കെതിരേയാണ് വിമര്‍ശനം. ഈ സമയത്ത് ഇത്തരം കാര്യങ്ങളിലല്ല സര്‍ക്കാര്‍ ശ്രദ്ധിക്കേണ്ടതെന്നും ജനാധിപത്യപരമായി പ്രതിഷേധം നടത്തിയവരെ അറസ്റ്റ് ചെയ്ത് എതിര്‍സ്വരങ്ങളെ അടിച്ചമര്‍ത്തുന്നത് ശരിയായ രീതിയല്ലെന്നുമാണ് സംഘടനയുടെ റിപ്പോര്‍ട്ടില്‍ പറയുന്നത്. നേരത്തെയും ഇന്ത്യയിലെ ന്യൂനപക്ഷ വേട്ടയ്‌ക്കെതിരേ യു.എസ് കമ്മിഷന്‍ ഫോര്‍ ഇന്റര്‍നാഷനല്‍ റിലീജ്യസ് ഫ്രീഡം വിമര്‍ശനവുമായി രംഗത്തെത്തിയിരുന്നു.

സംഘടനയുടെ റിപ്പോര്‍ട്ടില്‍ ഡല്‍ഹിയിലെ ആക്ടിവിസ്റ്റും ജാമിഅ മില്ലിയ്യയിലെ ഗവേഷകയുമായ സഫൂറ സര്‍ഗാറിന്റെ അറസ്റ്റ് എടുത്തുപറയുന്നുണ്ട്. ഗര്‍ഭിണിയായ ഇവരെ യു.എ.പി.എ ചുമത്തി തടവില്‍ പാര്‍പ്പിച്ചതിനെതിരേ രാജ്യത്തും പ്രതിഷേധം പടരുന്നുണ്ട്.