ചെര്‍ക്കള: ഇടിമിന്നലില്‍ പറമ്പിലെ തെങ്ങുകള്‍ കരിഞ്ഞു. പറമ്പില്‍ ബാക്കിയുള്ള തെങ്ങുകള്‍ക്കും ഇടിമിന്നലില്‍ കേടുപാടുകള്‍ സംഭവിച്ചു. ചെര്‍ക്കള കെട്ടുംകല്ലിലെ കെ.എ മുഹമ്മദിന്റെ പറമ്പിലെ 11 തെങ്ങുകളാണ് ഇടിമിന്നലില്‍ പൂര്‍ണമായും നശിച്ചത്.
തന്റെ പറമ്പില്‍ ബാക്കിയുള്ള 38 തെങ്ങുകള്‍ക്കും ഭാഗികമായി ഇടിമിന്നലിന്റെ പ്രഹരമേറ്റതായി മുഹമ്മദ് പറഞ്ഞു. കഴിഞ്ഞ ദിവസമുണ്ടായ ശക്തമായ ഇടിമിന്നലിലാണ് തെങ്ങുകള്‍ നശിച്ചത്. അതേസമയം, ഇടിമിന്നലിനെ തുടര്‍ന്നു നശിച്ച തെങ്ങുകള്‍ക്കു നഷ്ടപരിഹാരം ചോദിച്ചു കൃഷി ഭവനിലെത്തിയ മുഹമ്മദിനു നിരാശനായി മടങ്ങേണ്ടിവന്നു.
കാറ്റിലും മറ്റും തെങ്ങുകള്‍ നശിച്ചാല്‍ നഷ്ടപരിഹാരം നല്‍കാന്‍ വഴിയുണ്ടെന്നും ഇടിമിന്നലില്‍ നശിച്ചാല്‍ നഷ്ടപരിഹാരം നല്‍കാന്‍ നിര്‍വാഹമില്ലെന്നും ഉദ്യോഗസ്ഥര്‍ പറഞ്ഞതായി മുഹമ്മദ് പറഞ്ഞു.