പാരിപ്പള്ളി: കല്ലുവാതുക്കല്‍ പഞ്ചായത്തിലെ ചിറക്കര ശാസ്ത്രിമുക്കില്‍ ബിവറേജസ് കോര്‍പ്പറേഷന്റെ മദ്യശാല തുറന്നത് റോഡ് ഉപരോധമടക്കമുള്ള സമരങ്ങള്‍ക്ക് കാരണമായി. ജനരോഷം ഭയന്ന് തിങ്കളാഴ്ച രാത്രിയോടെ രഹസ്യമായാണ് അധികൃതര്‍ പാരിപ്പള്ളിയിലെ മദ്യശാല ശാസ്ത്രിമുക്കിലെ ആളൊഴിഞ്ഞ പറമ്പിലെ വാടകവീട്ടിലേക്ക് മാറ്റിയത്. ഇന്നലെ വെളുപ്പിന് ഇക്കാര്യമറിഞ്ഞ സ്ത്രീകള്‍ അടക്കമുള്ള പ്രദേശവാസികള്‍ പ്രതിഷേധവുമായി സ്ഥലത്ത് തടിച്ചുകൂടുകയായിരുന്നു. ഒന്‍പത് മണിയോടെ മദ്യവില്‍പ്പന ആരംഭിച്ചത് നാട്ടുകാര്‍ തടഞ്ഞതോടെ മദ്യം വാങ്ങാനെത്തിയവര്‍ എതിര്‍ത്തതോടെ ഇരുവിഭാഗങ്ങള്‍ തമ്മില്‍ ഉന്തും തള്ളുമുണ്ടായി. ഇതോടെ ചാത്തന്നൂര്‍ എ.സി.പി ജവഹര്‍ജനാര്‍ദിന്റെ നേതൃത്വത്തില്‍ സ്ഥലത്തുണ്ടായിരുന്ന വന്‍ പോലിസ് സംഘം ഇടപെട്ട് ഇരുവിഭാഗങ്ങളെയും അനുനയിപ്പിക്കുകയായിരുന്നു.
തുടര്‍ന്ന് നാട്ടുകാര്‍ മദ്യശാലയ്ക്ക് മുന്നില്‍ കുത്തിയിരുന്ന് പ്രതിഷേധിച്ചു. വിവിധ രാഷ്ട്രീയകക്ഷിനേതാക്കളായ ജയപ്രകാശ്, ധര്‍മ്മപാലന്‍, ഗോപകുമാര്‍, ജയചന്ദ്രന്‍, തോമസ്, രാജേഷ്, കൃഷ്ണകുമാര്‍, ലൈജു വാര്‍ഡംഗങ്ങളായ രജനി, സിന്ധു, വിഷ്ണു എന്നിവര്‍ സമരാനുകൂലികളെ അഭിസംബോധന ചെയ്തു സംസാരിച്ചു. പ്രതിഷേധക്കാരെ അറസ്റ്റ് ചെയ്യുമെന്ന പോലിസിന്റെ അറിയിപ്പിനെ തുടര്‍ന്ന് 11 മണിയോടെ സമരം അവസാനിപ്പിച്ചു. വൈകീട്ടോടെ നാട്ടുകാര്‍ ജനകീയസമരസമിതി രൂപീകരിച്ച് മദ്യശാലയില്‍ നിന്ന് കല്ലുവാതുക്കല്‍ വരെയും തിരിച്ചും പ്രതിഷേധ പ്രകടനവും തുടര്‍ന്ന് ചിറക്കര റോഡ് ഉപരോധവും നടത്തി. ഇന്ന് മുതല്‍ മദ്യശാലയ്ക്ക് മുന്നില്‍ പന്തല്‍ കെട്ടി അനിശ്ചിതകാലസമരം ആരംഭിക്കുമെന്നും സമരസമിതി ഭാരവാഹികള്‍ അറിയിച്ചു.