സ്വന്തം ലേഖകന്‍
തിരുവനന്തപുരം: മഹാമാരിയുടെ ഭീഷണിയില്‍ നിന്ന് രക്ഷനേടാന്‍ മികച്ച കരുതലലൊരുക്കുന്ന പിറന്ന മണ്ണിലേക്ക് പറന്നിറങ്ങാന്‍ വിമാനം കാത്തിരിക്കുന്നവര്‍ ഇനിയുമുണ്ട് നാലു ലക്ഷത്തിലേറെ. നോര്‍ക്കയിലും വിവിധ രാജ്യങ്ങളിലെ ഇന്ത്യന്‍ എംബസികളിലും രജിസ്റ്റര്‍ ചെയ്ത മലയാളികളുടെ കണക്കനുസരിച്ച് 4,60,912 പേരാണ് നാടണയാന്‍ കാത്തിരിക്കുന്നത്.
നാട്ടില്‍ വരാന്‍ കാത്തിരിക്കുന്ന പ്രവാസികളില്‍ 61,009 പേര്‍ തൊഴില്‍ നഷ്ടപ്പെട്ടതിനെത്തുടര്‍ന്നാണ് മടങ്ങുന്നത്. രജിസ്റ്റര്‍ ചെയ്തവരില്‍ 9,827 ഗര്‍ഭിണികളും 10,628 കുട്ടികളും 11,256 വയോജനങ്ങളുമുണ്ട്.
പഠനം പൂര്‍ത്തിയാക്കിയ 2,902 വിദ്യാര്‍ഥികളും വാര്‍ഷികാവധിക്ക് വരാനാഗ്രഹിക്കുന്ന 70,638 പേരും സന്ദര്‍ശന വിസ കാലാവധി കഴിഞ്ഞ 41,236 പേരും വിസ കാലാവധി കഴിഞ്ഞതും റദ്ദാക്കപ്പെട്ടവരുമായ 27,100 പേരും മടങ്ങിവരാന്‍ രജിസ്റ്റര്‍ ചെയ്ത പട്ടികയിലുണ്ട്. ജയില്‍ മോചിതരായ 806 പേരും മറ്റുള്ള കാരണങ്ങളാല്‍ 1,28,061 പേരും കേരളത്തിലേക്കു മടങ്ങാന്‍ ആഗ്രഹിക്കുന്നതായി കണക്കുകള്‍ സൂചിപ്പിക്കുന്നു.
മാലിയില്‍ നിന്ന് നാട്ടിലെത്താന്‍ 2,689 പേരാണ് രജിസ്റ്റര്‍ ചെയ്തത്. ഇതില്‍ 1,600ഓളം പേരെ നാട്ടിലെത്തിച്ചിട്ടുണ്ട്. ഇതു കൂടാതെ ഇതര സംസ്ഥാനങ്ങളില്‍ നിന്ന് രണ്ടു ലക്ഷത്തോളം മലയാളികളാണ് നോര്‍ക്കയില്‍ രജിസ്റ്റര്‍ ചെയ്തത്. ഇതില്‍ ഏതാണ്ട് 60,000ത്തോളം പേര്‍ കേരളത്തിലെത്തിയിട്ടുണ്ട്. വിദേശത്തു നിന്ന് പ്രത്യേക വിമാനങ്ങളിലെത്തിയവരും ഇതര സംസ്ഥാനങ്ങളില്‍ നിന്നെത്തിയവരും വിവിധി ക്വാറന്റൈന്‍ കേന്ദ്രങ്ങളില്‍ നിരീക്ഷണത്തിലാണ്.

ദോഹയില്‍നിന്നുള്ള സംഘമെത്തി;
റിയാദ് വിമാനം ഇന്ന്

കൊണ്ടോട്ടി: കൊവിഡ്19നെ തുടര്‍ന്ന് ദോഹയില്‍നിന്നുളള പ്രത്യേക വിമാനം ഇന്നലെ കരിപ്പൂരിലെത്തി.
എയര്‍ ഇന്ത്യ എക്‌സ്പ്രസ് 374 വിമാനത്തില്‍ 183 പ്രവാസികളാണ് തിരിച്ചെത്തിയത്. ഇതില്‍ 105 സ്ത്രീകളും 78 പുരുഷന്മാരുമായിരുന്നു. യാത്രക്കാരില്‍ 73 പേരും കോഴിക്കോട് ജില്ലക്കാരായിരുന്നു.മലപ്പുറം 47, ആലപ്പുഴ ഒന്ന്, എറണാകുളം ഒന്ന്, കണ്ണൂര്‍ 27,കാസര്‍കോഡ് 17, പാലക്കാട് 12, തൃശൂര്‍ ഒന്ന്,വയനാട് നാല് യാത്രക്കാരുമെത്തി.ഇന്ന് എയര്‍ ഇന്ത്യയുടെ വിമാനം റിയാദില്‍നിന്നെത്തും. രാത്രി 8.30നാണ് വിമാനം കരിപ്പൂരിലെത്തുക.
20ന് സലാലയില്‍ നിന്നാണ് വിമാനം ഷെഡ്യൂള്‍ ചെയ്തിരിക്കുന്നത്.21നു വൈകുന്നേരം 4.25ന് മസ്‌ക്കറ്റില്‍ നിന്നും 23ന് ദുബൈയില്‍നിന്നും പ്രവാസികളുമായി കരിപ്പൂരില്‍ വിമാനമെത്തും.