പുതുക്കാട്: മണ്ഡലത്തില്‍ ഡെങ്കിപ്പനി പടരുന്നതായി റിപ്പോര്‍ട്ട് . ഡെങ്കിപ്പനി സ്ഥിരീകരിച്ച 39 പേരാണ് വിവിധ ഭാഗങ്ങളിലായി ചികിത്സ തേടിയത്. ഡങ്കിക്ക് പുറമെ എലിപ്പനിയും മഞ്ഞപ്പിത്തവും റിപ്പോര്‍ട്ടു ചെയ്തിട്ടുണ്ട്.
ആരോഗ്യ വകുപ്പ് പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കിയെങ്കിലും ജീവനക്കാരുടെ കുറവ് പ്രതിരോധ പ്രവര്‍ത്തനങ്ങള്‍ക്ക് തിരിച്ചടിയായി.
മന്ത്രി സി. രവീന്ദ്രനാഥിന്റെ നിര്‍ദേശാനുസരണം നടത്തിയ മണ്ഡലംതല അവലോകന യോഗത്തിലാണ് വിവരങ്ങള്‍ പുറത്തുവന്നത്. മറ്റത്തൂര്‍ പഞ്ചായത്തില്‍ നിലവില്‍ 20 പേരില്‍ ഡെങ്കിപ്പനി കണ്ടെത്തിയിട്ടുണ്ട്. കൊടകരയില്‍ എട്ടും തൃക്കൂരില്‍ അഞ്ചു പേര്‍ക്കും പനിബാധയുണ്ട്. വരന്തരപ്പിള്ളിയിലും നെന്മണിക്കരയിലും മൂന്നു വീതം ഡെങ്കി റിപ്പോര്‍ട്ടു ചെയ്തു.
പുതുക്കാട്, അളഗപ്പനഗര്‍, പറപ്പൂക്കര, വല്ലച്ചിറ പഞ്ചായത്തുകളില്‍ ഡെങ്കി കണ്ടെത്തിയിട്ടില്ല. എന്നാല്‍ പുതുക്കാട് പഞ്ചായത്തില്‍ ഒരാള്‍ക്ക് എലിപ്പനി ബാധയുണ്ടായിട്ടുണ്ട്.
വരന്തരപ്പിള്ളിയില്‍ അഞ്ചുപേര്‍ക്കും മറ്റത്തൂരില്‍ മൂന്നു പേര്‍ക്കും മഞ്ഞപ്പിത്തവും സ്ഥിരീകരിച്ചു.കഴിഞ്ഞ ആറുമാസത്തെ കണക്ക് പ്രകാരം മണ്ഡലത്തില്‍ പനി നിരക്കില്‍ ഗണ്യമായ കുറവുണ്ട്.
ആരോഗ്യ വകുപ്പിന്റെ 'പ്രതിദിനം പ്രതിരോധം' പരിപാടിയുടെ ഫലമായി കഴിഞ്ഞ മാസങ്ങളില്‍ 2082 പനി മാത്രമാണ് റിപ്പോര്‍ട്ട് ചെയ്തത്. നേരത്തേ ഇത് അയ്യായിരമായിരുന്നു.പനി നിയന്ത്രണ വിധേയമാണെങ്കിലും മണ്ഡലത്തില്‍ വ്യാപകമായി പ്രതിരോധ ക്യാംപുകള്‍ നടത്താന്‍ യോഗത്തില്‍ തീരുമാനമായിട്ടുണ്ട്. വീടുകളില്‍ ആരോഗ്യ പ്രവര്‍ത്തകര്‍ നേരിട്ട് ബോധവല്‍ക്കരണവും പ്രതിരോധ നടപടികളും കൈക്കൊള്ളുമെന്നും ആരോഗ്യവകുപ്പ് അധികൃതര്‍ അറിയിച്ചു.
പൊതുമരാമത്ത് വകുപ്പിന്റെ നേതൃത്വത്തില്‍ മണ്ഡലത്തിലെ കാനകള്‍ വൃത്തിയാക്കുവാനും കുടിവെള്ള വിതരണ പൈപ്പുകളില്‍ വ്യാപകമായുള്ള ചോര്‍ച്ചകള്‍ വകുപ്പധികൃതര്‍ തന്നെ അറ്റകുറ്റപ്പണി ചെയ്യുവാനും തീരുമാനമായി.