തിരുവനന്തപുരം: കൊവിഡ് മഹാമാരിയില്‍ നിന്നും സംസ്ഥാനത്തെ രക്ഷിക്കാന്‍ കേരളത്തിന്റെ സഹായം അഭ്യര്‍ഥിച്ച് മഹാരാഷ്ട്ര സര്‍ക്കാര്‍. പരിചയസമ്പന്നരായ 50 ഡോക്ടര്‍മാരെയും 100 നഴ്‌സുമാരെയും താല്‍ക്കാലികമായി വിട്ടു തരണമെന്നാവശ്യപ്പെട്ട് മഹാരാഷ്ട്ര മെഡിക്കല്‍ എഡ്യുക്കേഷന്‍ ആന്റ് റിസര്‍ച്ച് ഡയറക്ടര്‍ ഡോ. ടി.പി. ലഹാന്‍ ആരോഗ്യമന്ത്രി കെ കെ ശൈലജക്ക് കത്തയച്ചു. മുംബൈയിലും പൂനയിലും കൊവിഡ് വലിയ തോതില്‍ പടര്‍ന്നു പിടിച്ചിട്ടുണ്ടെന്നും കത്തില്‍ ചൂണ്ടിക്കാണിക്കുന്നു. മുംബയില്‍ കൊവിഡ് നിയന്ത്രണത്തിനായി തുടങ്ങാനിരിക്കുന്ന 600 ബെഡുള്ള ആശുപത്രിയിലേക്കാണ് ആരോഗ്യപ്രവര്‍ത്തകരുടെ സേവനം അഭ്യര്‍ഥിച്ചിരിക്കുന്നത്.
എം.ബി.ബി.എസ് ഡോക്ടര്‍മാര്‍ക്ക് പ്രതിമാസം 80,000 രൂപയും എം.ഡി, എം.എസ് സ്‌പെഷലിസ്റ്റ് ഡോക്ടര്‍മാര്‍ക്ക് രണ്ട് ലക്ഷം രൂപയും ശമ്പളമായി നല്‍കും. നഴ്‌സുമാര്‍ക്ക് 30,000 രൂപയാണ് ശമ്പളം നല്‍കുമെന്നും കത്തിലുണ്ട്.