ട്രിപ്പോളി: അഭയാര്‍ഥികള്‍ സഞ്ചരിച്ച ബോട്ട് ലിബിയന്‍ തീരത്ത് മറിഞ്ഞ് 100 പേര്‍ മരിച്ചു. ഇറ്റലിയിലേക്ക് മെഡിറ്ററേനിയന്‍ കടല്‍ കടന്ന് പോകാന്‍ ശ്രമിക്കുന്നതിനിടെയാണ് അപകടം.

ഏറ്റവും കൂടുതല്‍ അഭയാര്‍ഥികള്‍ സഞ്ചരിക്കുന്ന വഴിയാണിത്. 2017 ല്‍ 1,20,000 പേരാണ് ഈവഴി ഇറ്റലിയിലേക്കും മറ്റ് യൂറോപ്യന്‍ രാജ്യങ്ങളിലേക്കും എത്തിയത്.

ഈ മാസം ആദ്യത്തില്‍ തൂനിഷ്യന്‍ തീരത്ത് ബോട്ട് മറിഞ്ഞ് 112 അഭയാര്‍ഥികള്‍ മരിച്ചിരുന്നു. ഫെബ്രുവരിയില്‍ ലിബിയയുടെ പടിഞ്ഞാറേ തീരത്ത് ബോട്ട് അപകടത്തില്‍പ്പെട്ട് 90 പേരും മരിച്ചു.

ലോകത്തെ ഏറ്റവും മരണം നടക്കുന്ന അതിര്‍ത്തിയാണ് മെഡിറ്ററേനിയന്‍ കടലെന്ന് അന്താരാഷ്ട്ര അഭയാര്‍ഥി സംഘടന പറഞ്ഞിരുന്നു. കഴിഞ്ഞവര്‍ഷം വടക്കന്‍ ആഫ്രിക്കയില്‍ നിന്ന് യൂറോപ്പിലേക്ക് കടക്കാന്‍ ശ്രമിച്ച 3,116 പേരാണ് കടലില്‍ മരിച്ചത്.

അഭയാര്‍ഥി പ്രശ്‌നം പരിഹരിക്കുന്നതിന് യൂറോപ്യന്‍ യൂനിയന്‍ രാജ്യങ്ങള്‍ കരാറിലെത്തിയ വാര്‍ത്ത എത്തുന്നതിനിടെയാണ് പുതിയ അപകട വാര്‍ത്തയും.