തിരുവനന്തപുരം: അതിരൂക്ഷമായ സാമ്പത്തിക പ്രതിസന്ധിയിലൂടെ സംസ്ഥാനം കടന്നുപോകുന്നതിനിടെ കെ.എസ്.എഫ്.ഇയില്‍ ധൂര്‍ത്ത്.
ചെയര്‍മാന് പുതിയ ഇന്നോവ ക്രിസ്റ്റ കാര്‍ വാങ്ങുന്നതിന് സര്‍ക്കാരിന്റെ അനുമതി ലഭിച്ചതിനു പിന്നാലെ സ്വന്തം ഓണറേറിയം വര്‍ധിപ്പിക്കുന്നതിന് ചെയര്‍മാന്‍ തന്നെ ബോര്‍ഡില്‍ വിഷയം അവതരിപ്പിക്കുകയും ചെയ്തു.
2016 മോഡല്‍ ഇന്നോവ കാര്‍ ആണ് നിലവില്‍ ചെയര്‍മാനുള്ളത്. ഇതിന് മറ്റു പ്രശ്‌നങ്ങളൊന്നും ഇല്ലെന്നിരിക്കേയാണ് ഇന്നോവ ക്രിസ്റ്റ പുതിയ മോഡല്‍ വാങ്ങാന്‍ സര്‍ക്കാരിനോട് ചെയര്‍മാന്‍ അനുമതി തേടിയത്. ഈ ആവശ്യം ഉന്നയിച്ചുള്ള കെ.എസ്.എഫ്.ഇ എം.ഡിയുടെ കത്ത് പരിഗണിച്ച സര്‍ക്കാര്‍ 20,17,080 രൂപ വിനിയോഗിച്ച് കാര്‍ വാങ്ങുന്നതിന് അനുമതിയും നല്‍കി. നിലവിലെ കാര്‍ ഓടാന്‍ കഴിയാത്ത വിധത്തില്‍ കേടായതിനാലാണ് പുതിയ വാഹനം വാങ്ങാന്‍ അനുമതി നല്‍കുന്നതെന്നും ഉത്തരവില്‍ പറഞ്ഞിട്ടുണ്ട്. എന്നാല്‍ പഴയ വാഹനം മികച്ച കണ്ടീഷനില്‍ ആയിരുന്നതിനാല്‍ മുന്‍ എം.ഡി എ.പുരുഷോത്തമന്‍ പുതിയ കാറിന് പര്‍ച്ചേസ് ഓര്‍ഡര്‍ നല്‍കിയിരുന്നില്ല.
അദ്ദേഹം ഫെബ്രുവരി 28ന് വിരമിച്ചതിന് ശേഷം പുതിയ എം.ഡി ചുമതലയേറ്റെടുത്തപ്പോഴാണ് സര്‍ക്കാര്‍ ഉത്തരവിന്റെ അടിസ്ഥാനത്തില്‍ പുതിയ ഇന്നോവ വാങ്ങുന്നതിനുള്ള പര്‍ച്ചേസ് ഓര്‍ഡര്‍ നല്‍കിയത്.
ഇതിനിടെ ബോര്‍ഡ് യോഗം ചേര്‍ന്ന് ചെയര്‍മാന്റെ ഓണറേറിയവും അംഗങ്ങളുടെ സിറ്റിങ് ഫീസും വര്‍ധിപ്പിക്കാനും തീരുമാനിച്ചിരുന്നു. ചെയര്‍മാന്റെ പ്രതിമാസ ഓണറേറിയം 50,000 രൂപയായാണ് വര്‍ധിപ്പിച്ചത്. നേരത്തെ 20,000 രൂപയായിരുന്നിടത്താണ് 30,000 വര്‍ധന വരുത്തിയത്. അംഗങ്ങളുടെ സിറ്റിങ് ഫീസ് 3,000 രൂപയായാണ് വര്‍ധിപ്പിച്ചത്. 12 സിറ്റിങ് വരെ 3,000 രൂപയും അതിനു ശേഷമുള്ളവയ്ക്ക് 2,500 രൂപ വീതവുമെന്നാണ് ബോര്‍ഡ് യോഗം തീരുമാനിച്ചത്. കമ്മിറ്റികളില്‍ പങ്കെടുക്കുന്നതിനുള്ള ഫീസ് 1,500 രൂപയായും ഉയര്‍ത്തി.
ഇത്തരം സ്ഥാപനങ്ങളിലെ അംഗങ്ങളുടെ ബോര്‍ഡ് യോഗങ്ങളിലെ സിറ്റിങ് ഫീസ് 2,000 രൂപയില്‍ കൂടാന്‍ പാടില്ലെന്നിരിക്കേയാണ് കെ.എസ്.എഫ്.ഇ ബോര്‍ഡിന്റെ ഈ തീരുമാനമെന്നു പറയുന്നു. ബോര്‍ഡ് അംഗങ്ങളുടെ മൊബൈല്‍ ഫോണ്‍ അലവന്‍സ് മാസം 2,500 ആയി ഉയര്‍ത്തണമെന്നാവശ്യപ്പെട്ട് കെ.എസ്.എഫ്.ഇ സര്‍ക്കാരിന് എഴുതിയിരുന്നു. എന്നാല്‍ 1500 ആയിരുന്ന ഈ തുക സര്‍ക്കാര്‍ 440 രൂപയായി വെട്ടിക്കുറയ്ക്കുകയായിരുന്നു. ഇതേതുടര്‍ന്ന് പഴയ തുകയെങ്കിലുമാക്കി തരണമെന്നാവശ്യപ്പെട്ട് കെ.എസ്.എഫ്.ഇ വീണ്ടും സര്‍ക്കാരിന് എഴുതിയിട്ടുണ്ട്.