കാസര്‍കോട്: അന്തര്‍ സംസ്ഥാന പാതയോരത്ത് സ്ഥിതി ചെയ്യുന്ന തലപ്പാടി ടോള്‍ബൂത്തില്‍ കഴിഞ്ഞ ദിവസം രണ്ടു വൃദ്ധരായ സ്ത്രീകളോട് അപമര്യാദയായി പെരുമാറിയ ഉദ്യോഗസ്ഥരോട് കാര്യങ്ങള്‍ അന്വേഷിക്കാന്‍ ചെന്ന മംഗളൂരുവിലെ കന്ദക് മുഹമ്മദ് ഹമീദ് ഷറഫത്ത് എന്നയാളെ ഒരുകൂട്ടം ഉദ്യോഗസ്ഥര്‍ ചേര്‍ന്ന് ആക്രമിച്ച സംഭവത്തില്‍ അന്വേഷണം നടത്തണമെന്നും ഇത്തരം ഉദ്യോഗസ്ഥര്‍ക്കെതിരേ കര്‍ശന നടപടി എടുക്കണമെന്നും യൂത്ത് ലീഗ് മഞ്ചേശ്വരം മണ്ഡലം കമ്മിറ്റി ആവശ്യപ്പെട്ടു.
സംഭവത്തില്‍ പ്രസിഡന്റ് സൈഫുല്ല തങ്ങളുടെ നേതൃത്വത്തില്‍ ഉള്ളാള്‍ പൊലിസ് സി.ഐയെ കണ്ടു ചര്‍ച്ച നടത്തി. ടോള്‍ സമരവുമായി ബന്ധപ്പെട്ട ചര്‍ച്ചയില്‍ ഉണ്ടാക്കിയ കരാര്‍ ലംഘിച്ച് ജനങ്ങളെ വഞ്ചിച്ചുവെന്നും യൂത്ത് ലീഗ് നേതാക്കള്‍ സി.ഐയോട് പരാതിപ്പെട്ടു. നിരന്തരമായി ഇത്തരം ആക്രമണങ്ങള്‍ നടക്കുന്ന തലപ്പാടി ടോള്‍ ബൂത്തിലെ പ്രശ്‌നങ്ങള്‍ക്കു ഉടന്‍ പരിഹാരം കാണുമെന്നു സി.ഐ പ്രവര്‍ത്തകരെ അറിയിച്ചു. അക്രമത്തില്‍ പരുക്കേറ്റു സരോജ ആശുപത്രിയില്‍ പ്രവേശിപ്പിച്ച യുവാവിനെ സന്ദര്‍ശിച്ച ശേഷമാണ് യൂത്ത് ലീഗ് പ്രവര്‍ത്തകര്‍ സി.ഐ യെ കണ്ടത്. ചര്‍ച്ചയില്‍ മഞ്ചേശ്വരം ബ്ലോക്ക് പഞ്ചായത്തംഗം മുസ്തഫാ ഉദ്യാവര്‍, നാസര്‍, സിദ്ദീഖ്, റിയാസ് സംബന്ധിച്ചു.