വിജയവാഡ: കാമുകനുമായി ഫോണില്‍ സംസാരിച്ചതിന് ഹൈദരാബാദില്‍ പിതാവ് മകളെ കോടാലികൊണ്ട് തലക്കടിച്ച് കൊന്നു. ബി.ഫാം അവസാനവര്‍ഷ വിദ്യാര്‍ഥിനിയായ ചന്ദ്രിക(20)യേയാണ് പിതാവ് കൊലപ്പെടുത്തിയത്.കൃഷ്ണ ജില്ലയിലെ ചന്ദര്‍ലാപാഡുവിലാണ് സംഭവം.
ചന്ദ്രികയുടെ പിറന്നാള്‍ പിറ്റേന്നാണ് ക്രൂരമായ കൊലപാതകം. വെള്ളിയാഴ്ചയായിരുന്നു ചന്ദ്രികയുടെ ഇരുപതാം പിറന്നാള്‍. പിറന്നാള്‍ ആഘോഷത്തിന് ശേഷം ചന്ദ്രിക തന്റെ പ്രണയം മാതാപിതാക്കളോട് വെളിപ്പെടുത്തുകയായിരുന്നു. എന്നാല്‍ ഇത് അംഗീകരിക്കാന്‍ കഴിയില്ലെന്ന് പിതാവ് കോട്ടയ്യ പറഞ്ഞു. ചന്ദ്രിക കരഞ്ഞപേക്ഷിച്ചെങ്കിലും പിതാവ് തീരുമാനം മാറ്റിയില്ല. മേലാല്‍ കാമുകനുമായി ഒരു ബന്ധവും പാടില്ലെന്ന് പിതാവ് മകള്‍ക്ക് താക്കീതുംനല്‍കി. മറ്റൊരാളുമായി വിവാഹം ഉറപ്പിക്കാന്‍ പോവുകയാണെന്നും പിതാവ് പറഞ്ഞു.
ശനിയാഴ്ച രാവിലെ കാമുകനെ വിളിച്ച് വീട്ടില്‍ പ്രണയം എതിര്‍ത്ത കാര്യം അറിയിച്ചു. തനിക്ക് വേറെ വിവാഹം ഉറപ്പിക്കാന്‍ പോവുകയാണെന്നും എന്തെങ്കിലും ചെയ്യണമെന്നും ആവശ്യപ്പെട്ടു. ഈ സമയം പുറത്ത് പോയിരിക്കുകയായിരുന്ന കോട്ടയ്യ തിരിച്ചെത്തിയപ്പോള്‍ മകള്‍ കാമുകനുമായി ഫോണില്‍ സംസാരിക്കുന്നതാണ് കണ്ടത്. ഇതില്‍ കുപിതനായ ഇയാള്‍ കോടാലിയുടെ പിടി കൊണ്ട് മകളുടെ തലക്കടിച്ച് കൊലപ്പെടുത്തുകയായിരുന്നു.
സംഭവത്തില്‍ പിതാവ് കോട്ടയ്യക്കെതിരേ പൊലിസ് കൊലക്കുറ്റത്തിന് കേസെടുത്ത് അറസ്റ്റ് ചെയ്തു. അതിനിടെ പെണ്‍കുട്ടി സ്‌നേഹിച്ചത് അന്യ ജാതിയില്‍ പെട്ട ആളായിരുന്നെന്നും ദുരഭിമാനക്കൊലയാണ് നടന്നതെന്നും അയല്‍ക്കാരായ ചിലര്‍ ആരോപണമുന്നയിച്ചിട്ടുണ്ട്.