തിരുവനന്തപുരം: സംസ്ഥാന പ്രസിഡന്റിനെപ്പോലും കണ്ടെത്താന്‍ കഴിയാത്തതരത്തില്‍ ആഭ്യന്തര കലഹം രൂക്ഷമായ ബി.ജെ.പി സംസ്ഥാന ഘടകത്തെ രക്ഷിക്കാന്‍ ദേശീയ അധ്യക്ഷന്‍ അമിത് ഷാ നാളെയെത്തും. ഒരു ദിവസത്തെ സന്ദര്‍ശനമാണ് അമിത് ഷായുടേത്. അതിനുള്ളില്‍തന്നെ പ്രശ്‌നങ്ങളെല്ലാം പരിഹരിക്കാമെന്ന കണക്കുകൂട്ടലിലാണ് അദ്ദേഹം എത്തുന്നത്. 

ലോക്‌സഭാ തെരഞ്ഞെടുപ്പ് അടുത്തിരിക്കെ എത്രയും പെട്ടെന്ന് സംസ്ഥാന പ്രസിഡന്റിനെ തെരഞ്ഞെടുക്കുന്നതിന് അഭിപ്രായ സമന്വയമുണ്ടാക്കുകയാണ് അമിത് ഷായുടെ പ്രധാന ലക്ഷ്യം. കേരളത്തില്‍ നിന്ന് ലോക്‌സഭയിലേക്ക് അക്കൗണ്ട് തുറക്കുകയെന്നതും പാര്‍ട്ടി നേതൃത്വത്തിന്റെ ലക്ഷ്യമാണ്.
ഗ്രൂപ്പിസം രൂക്ഷമായ കേരളത്തില്‍ നിന്ന് അമിത്ഷായുടെ ഫെയ്‌സ്ബുക്ക് പേജിലേക്ക് കേരളത്തില്‍ നിന്ന് വ്യാപകമായ രീതിയില്‍ കമന്റുകള്‍ വന്നത് ഗൗരവത്തോടെയാണ് നേതൃത്വം കാണുന്നത്. ബി.ജെ.പി നേതാവ് ലസിത പാലയ്ക്കലിനുനേരെയുണ്ടായ മോശം പരാമര്‍ശത്തിന്റെ പേരില്‍ ഗ്രൂപ്പുകള്‍ തമ്മിലടിച്ചതിന്റെ ഫലമായിരുന്നു ഇത്.
സംസ്ഥാന പ്രസിഡന്റിനെ കണ്ടെത്താന്‍ ആര്‍.എസ്.എസ് സംസ്ഥാന നേതൃത്വവുമായി അമിത് ഷാ കൂടിക്കാഴ്ച നടത്തിയേക്കും. പ്രസിഡന്റ് സ്ഥാനം ഒഴിവു വന്നതിനു ശേഷം സംസ്ഥാനത്ത് ബി.ജെ.പി നേതൃത്വത്തില്‍ ഉണ്ടായ ഭിന്നതയും ദേശീയ സഹസംഘടനാ സെക്രട്ടറി ബി.എല്‍ സന്തോഷിന്റെ റിപ്പോര്‍ട്ടും അമിത് ഷാ പരിശോധിച്ചേക്കും. നാളത്തന്നെ സംസ്ഥാന പ്രസിഡന്റിന്റെ കാര്യത്തില്‍ ഏകദേശ തീരുമാനമുണ്ടാകാനാണ് സാധ്യത.
നാളെ രാവിലെ തിരുവനന്തപുരത്ത് എത്തുന്ന അമിത് ഷാ പാര്‍ട്ടി നേതാക്കള്‍ പങ്കെടുക്കുന്ന യോഗത്തില്‍ സംസാരിക്കും. ഉച്ചക്ക് 12 മുതല്‍ വൈകുന്നേരം ആറ് വരെ സംസ്ഥാന കോര്‍ കമ്മറ്റി യോഗത്തിലും ഷാ പങ്കെടുക്കുന്നുണ്ട്. ഈ യോഗത്തില്‍ പാര്‍ട്ടി ഭാരവാഹികളുടെ പ്രവര്‍ത്തനങ്ങള്‍ വിലയിരുത്തും.
കേന്ദ്ര സര്‍ക്കാരിന്റെ പ്രവര്‍ത്തനങ്ങള്‍ ജനങ്ങളിലെത്തിക്കുന്നതിനുള്ള പ്രചാരണം സംഘടിപ്പിക്കുകയും കേരളത്തില്‍ നടപ്പാക്കേണ്ട പദ്ധതികള്‍ക്ക് രൂപം നല്‍കുകയും ചെയ്യും.