കൊച്ചി:പാലിയേക്കര ടോള്‍ പിരിവിന്റെ മറവില്‍ കോടികളുടെ വെട്ടിപ്പ് നടക്കുന്നതായി സാമൂഹിക പ്രവര്‍ത്തകന്‍ ഖാലിദ് മുണ്ടപ്പള്ളി വാര്‍ത്താസമ്മേളനത്തില്‍ ആരോപിച്ചു. നിലവിലുള്ള അങ്കമാലി ഇടപ്പള്ളി വരെയുള്ള 26 കിലോമീറ്ററിനും അങ്കമാലി മുതല്‍ മണ്ണുത്തി വരെയുള്ള 56 കിലോമീറ്ററിനും കൂടി 82 കിലോമീറ്റര്‍ ദൂരത്തിനാണ് ഇവിടെ ടോള്‍പിരിവ് നടത്തുന്നത്. 2012ല്‍ പദ്ധതി തുടങ്ങുമ്പോള്‍ നിര്‍മാണ ചെലവ് കണക്കാക്കിയിരുന്നത് 312 കോടിയായിരുന്നു. ഇത് 630 കോടിയായും പിന്നീട് 721.17 കോടിയുമായി ഉയര്‍ത്തി. എന്നാല്‍ ടോള്‍പിരിവിന്റെ മറവില്‍ നിര്‍മാണ ചെലവിന്റെ ഇരട്ടിയിലധികം തുക പിരിച്ചെടുക്കാനാണ് ദേശീയപാത അതോറിറ്റി ശ്രമിക്കുന്നതെന്ന് അദ്ദേഹം ആരോപിച്ചു. ഒരു ദിവസം 34,94,863 രൂപയാണ് ഇവിടെ നിന്ന് ടോള്‍ പിരിക്കുന്നത്. പ്രതിമാസം 10,48,45,890 രൂപയും പ്രതി വര്‍ഷം 125,81,50,680 രൂപയും പിരിച്ചെടുക്കുന്നുണ്ട്. 2012 മുതല്‍ 2018 ഡിസംബര്‍ വരെ 644,10,21,760 രൂപ പിരിച്ചെടുത്തിട്ടുണ്ടെന്നും അദ്ദേഹം പറഞ്ഞു. ടോള്‍ പിരിവിന്റെ മറവില്‍ ജനങ്ങളെ ചൂഷണം ചെയ്ത് നടത്തുന്ന അഴിമതിക്ക് പിന്നിലുള്ളവര്‍ക്കെതിരേ നടപടിയെടുക്കണമെന്നും അദ്ദേഹം ആവശ്യപ്പെട്ടു. ഇത് സംബന്ധിച്ച് പ്രധനമന്ത്രി ഉള്‍പ്പെടയുള്ളവര്‍ക്ക് പരാതിനല്‍കിയെങ്കിലും ഫലമുണ്ടായില്ല.സി.ബി.ഐ അന്വേഷണമാരംഭിച്ചെങ്കിലും തുടക്കത്തില്‍ തന്നെ മുടങ്ങിയതായും അദ്ദേഹം പറഞ്ഞു.