തിരുവനന്തപുരം: സംസ്ഥാനത്തെ അധ്യാപക കോഴ്‌സായ ഡിപ്ലോമ ഇന്‍ എലിമെന്ററി എജുക്കേഷന്‍ (ഡി.എല്‍.എഡ്) പഠിക്കുന്ന വിദ്യാര്‍ഥികളുടെ ഭാവി അനിശ്ചിതത്വത്തില്‍.
കൊവിഡ് നിയന്ത്രണങ്ങള്‍ പാലിച്ച് എസ്.എസ്.എല്‍.സിയും ഹയര്‍സെക്കന്‍ഡറി പരീക്ഷകളും പൂര്‍ത്തിയാക്കിയ സര്‍ക്കാര്‍, ഡി.എല്‍.എഡ് വിദ്യാര്‍ഥികളുടെ കാര്യം മറന്നു.
ഏപ്രിലില്‍ നടക്കേണ്ടിയിരുന്ന ഡി.എല്‍.എഡ് പരീക്ഷ ഇതുവരെ നടന്നിട്ടില്ല. ഇതോടെ വിദ്യാര്‍ഥികളുടെ ഭാവിയാണ് അനിശ്ചിതത്വത്തിലായത്.
സംസ്ഥാനത്ത് 104 സ്ഥാപനങ്ങളിലായി 12,000 ലധികം പേര്‍ പ്രൈമറി വിഭാഗം അധ്യാപകരാകാന്‍ പഠിക്കുന്നുണ്ട്. ഇതില്‍ 6000ത്തോളം പേര്‍ അവസാന സെമസ്റ്റര്‍ പരീക്ഷ എഴുതാനുണ്ട്. പരീക്ഷ നടക്കാത്തതിനാല്‍ ഈ വിദ്യാര്‍ഥികളെല്ലാം ആശങ്കയിലാണ്. സംസ്ഥാനത്തെ പ്രധാന പൊതുപരീക്ഷകള്‍ പൂര്‍ത്തിയായിട്ടും ഇവരുടെ പരീക്ഷ നടത്തുന്ന കാര്യത്തില്‍ സര്‍ക്കാര്‍ തിരിഞ്ഞുനോക്കുന്നില്ല. ഇതിനെതിരെ വ്യാപക പ്രതിഷേധമാണ് ഉയരുന്നത്.
കഴിഞ്ഞ ഏപ്രില്‍ 25നകം പരീക്ഷകള്‍ പൂര്‍ത്തീകരിക്കാന്‍ വേണ്ടി ടൈംടേബിള്‍ പ്രസിദ്ധീകരിച്ചിരുന്നതാണ്. എന്നാല്‍ ലോക്ക് ഡൗണ്‍ നിയന്ത്രണങ്ങള്‍ കാരണം നടന്നില്ല.
ഇവരുടെ പ്രാക്ടിക്കല്‍ ബോര്‍ഡിന്റെ സ്ഥാപനം സന്ദര്‍ശിച്ച് നടത്തേണ്ട നിരന്തര മൂല്യനിര്‍ണയ സ്‌കോറുകള്‍ അന്തിമമാക്കുന്ന നടപടിയും തടസപ്പെട്ടു. കേന്ദ്ര സര്‍ക്കാര്‍ അനുമതിയില്ലാത്തതുകൊണ്ടാണ് പരീക്ഷ നടത്താനാവാത്തതെന്നാണ് ഔദ്യോഗിക വിശദീകരണം.
ഈ കോഴ്‌സിന് പഠിക്കുന്ന കുട്ടികളില്‍ കെ ടെറ്റ് പാസായവരുമുണ്ട്.
ഇവരില്‍ പലരും ഈ വര്‍ഷം തന്നെ എയ്ഡഡ് സ്‌കൂളുകളില്‍ അധ്യാപക നിയമനം പ്രതീക്ഷിക്കുന്നവരുമാണ്. ഇവരും പ്രതിസന്ധിയിലാണ്. അതേസമയം പരീക്ഷ നടത്താനുള്ള അനുമതിക്കായി സര്‍ക്കാരിന് കത്ത് നല്‍കിയിട്ടുണ്ടെന്ന് പരീക്ഷാ സെക്രട്ടറി ലാല്‍ അറിയിച്ചു. അനുമതി ലഭിച്ചാല്‍ ജൂലൈ ആദ്യവാരം പരീക്ഷ നടത്തുമെന്നും അദ്ദേഹം സുപ്രഭാതത്തോട് പറഞ്ഞു.