തിരുവനന്തപുരം: തലസ്ഥാന നഗരിയില്‍ വിവിധ സ്ഥലങ്ങളില്‍ സംശയാസ്പദമായ സാഹചര്യത്തില്‍ ഡ്രോണ്‍ പറന്ന സംഭവത്തില്‍ മിലിട്ടറി ഇന്റലിജന്‍സ് അന്വേഷണം ആരംഭിച്ചു.
കോസ്റ്റ്ഗാര്‍ഡ് കേന്ദ്രം, ദക്ഷിണ വ്യോമസേനാ ആസ്ഥാനം, പാങ്ങോട് സൈനിക കേന്ദ്രം തുടങ്ങിയവ സ്ഥിതി ചെയ്യുന്ന സ്ഥലമായതിനാല്‍ സംഭവത്തെ ഗൗരവത്തോടെയാണ് സൈന്യം നിരീക്ഷിക്കുന്നത്. മിലിട്ടറി ഇന്റലിജന്‍സിന്റെ ചുമതലയുള്ള മേജറിന്റെ നേതൃത്വത്തിലാണ് അന്വേഷണം പുരോഗമിക്കുന്നത്. ജനവാസകേന്ദ്രങ്ങള്‍ക്ക് മുകളിലൂടെയാണ് ഇവ പറന്നതെന്നും സൈനികാവശ്യത്തിന് ഉപയോഗിക്കുന്ന ഡ്രോണുകളല്ലെന്നും സൈന്യത്തിന്റെ പ്രാഥമിക അന്വേഷണത്തില്‍ വ്യക്തമായിട്ടുണ്ട്.
പൊലിസ് ആസ്ഥാനത്തിന് മുകളില്‍ ഡ്രോണ്‍ കണ്ടു എന്ന റിപ്പോര്‍ട്ടിന്റെ അടിസ്ഥാനത്തില്‍ പൊലിസും വിശദമായ അന്വേഷണം ആരംഭിച്ചു. വിവാഹാവശ്യങ്ങള്‍ക്കും ഷൂട്ടിങിനും ഉപയോഗിക്കുന്ന തരത്തിലുള്ള ഡ്രോണ്‍ ആണിതെന്നാണ് പൊലിസിന്റെ പ്രാഥമിക നിഗമനം. സംഭവത്തില്‍ ദുരൂഹതയില്ലെന്ന് ഐ.ജി അശോക് യാദവ് പറഞ്ഞു.