കോട്ടയം: ലൈംഗീക പീഡനത്തിനിരയായെന്ന കന്യാസ്ത്രീയുടെ പരാതിയുടെ അടിസ്ഥാനത്തില്‍ ജലന്ധര്‍ ബിഷപ്പ് ഫ്രാങ്കോ മുളയ്ക്കല്‍ ഉടന്‍ അറസ്റ്റിലായേക്കും. പീഡനപരാതി നല്‍കിയ കന്യാസ്ത്രീയുടെ രഹസ്യമൊഴി രേഖപ്പെടുത്തിയ ശേഷമാണ് പൊലിസിന്റെ നീക്കം. 

അന്വേഷണസംഘം ഇന്നോ നാളെയോ ജലന്ധറിലേക്ക് പോവും. രഹസ്യമൊഴി എടുക്കുന്നതിനുളള പൊലിസിന്റെ അപേക്ഷ കോടതി അംഗീകരിച്ചു. വൈക്കം ഡിവൈ.എസ്.പി.കെ.സുഭാഷാണ് അന്വേഷണത്തിന് നേതൃത്വം നല്‍കുന്നത്.
കോട്ടയത്തുനിന്നുള്ള ഫൊറന്‍സിക് വിദഗ്ധരുടെ സംഘം ഇന്നലെ കുറവിലങ്ങാട്ടെ മഠത്തിലെത്തി പരിശോധന നടത്തിയിരുന്നു. ശാസ്ത്രീയതെളിവുകള്‍ ശേഖരിക്കുന്നതിന്റെ ഭാഗമായിരുന്നു പരിശോധന. സി.സി ടി.വി ദൃശ്യങ്ങള്‍, രജിസ്റ്ററുകള്‍ എന്നിവ പരിശോധിച്ചു. തെളിവുകള്‍ ശേഖരിക്കുന്നതിന്റെ ഭാഗമായി അന്വേഷണസംഘം ചാലക്കുടിയിലും പരിശോധന നടത്തും. കന്യാസ്ത്രീയുടെ മൊഴിയെ തുടര്‍ന്ന് പീഡനം, പ്രകൃതിവിരുദ്ധപീഡനം തുടങ്ങിയ കുറ്റങ്ങള്‍ ചുമത്തിയാണ് ജലന്ധര്‍ ബിഷപ്പിനെതിരേ കേസെടുത്തത്.
കുറവിലങ്ങാട് മഠത്തില്‍വച്ച് 13 തവണ പ്രകൃതിവിരുദ്ധ പീഡനത്തിനിരയാക്കിയെന്നാണ് കന്യാസ്ത്രീയുടെ മൊഴി. ഇത് സാധൂകരിക്കുന്ന തെളിവുകള്‍ കൂടി ലഭിച്ചതിന്റെ അടിസ്ഥാനത്തിലാണ് ബിഷപ്പിന്റെ അറസ്റ്റിന് സാധ്യത തെളിയുന്നത്. 13 തവണയും ബിഷപ്പ് കുറവിലങ്ങാട് മഠത്തിലെത്തിയതിനു സന്ദര്‍ശക രജിസ്റ്റര്‍ തെളിവാണ്. വൈദ്യപരിശോധനാ റിപോര്‍ട്ടും പീഡനം നടന്നതായി സ്ഥിരീകരിക്കുന്നു.
കൂടുതല്‍ തെളിവുകള്‍ക്കായി കന്യാസ്ത്രീയുടെ ഫോണ്‍ കസ്റ്റഡിയിലെടുത്തു. 2014 ഏപ്രില്‍ അഞ്ചിനാണ് ആദ്യ പീഡനത്തിന് ഇരയായതെന്നാണു കന്യാസ്ത്രീയുടെ മൊഴി.
ചാലക്കുടിയില്‍ സഭയുടെ ചടങ്ങില്‍ പങ്കെടുക്കാനെത്തിയ വേളയിലാണ് ബിഷപ്പ് കുറവിലങ്ങാട്ടെ മഠത്തിലെത്തിയത്. ഇതു സ്ഥിരീകരിക്കുന്നതിനാണ് അന്വേഷണസംഘം ചാലക്കുടിയില്‍ പോകുന്നത്. കന്യാസ്ത്രീയുടെ രഹസ്യമൊഴിയും ബിഷപ്പിന്റെ അറസ്റ്റില്‍ നിര്‍ണായകമാവും.