നിലമ്പൂര്‍: ബ്ലോക്ക് പഞ്ചായത്തിനു കീഴില്‍ ചുങ്കത്തറ കോട്ടേപ്പാടം സാമൂഹിക ആരോഗ്യകേന്ദ്രത്തിലെ ഡയാലിസിസ് യൂനിറ്റിലേക്കുള്ള മെഷീനുകള്‍ക്കുള്ള ആദ്യഗഡു കൈമാറി. നിലമ്പൂര്‍ ടി.ബി ഹാളില്‍ പി.വി അന്‍വര്‍ എം.എല്‍.എ മെഷീനുകള്‍ സ്ഥാപിക്കുന്ന കമ്പനി പ്രതിനിധികള്‍ക്ക് ചെക്ക് കൈമാറി.
എട്ടു മെഷീനുകളാണ് ആദ്യഘട്ടത്തില്‍ ഡയാലിസിസ് സെന്ററില്‍ സ്ഥാപിക്കുക. പി.വി അന്‍വര്‍ എം.എല്‍.എയുടെ മാതാപിതാക്കളുടെ പേരിലുള്ള പി.വി ഷൗക്കത്തലി ആന്‍ഡ് മറിയുമ്മ ചാരിറ്റബിള്‍ ട്രസ്റ്റില്‍ നിന്നു നല്‍കുന്ന ഡയാലിസിസ് മെഷീന്റെ തുക എം.എല്‍.എയില്‍നിന്നും ബ്ലോക്ക് പഞ്ചായത്ത് പ്രസിഡന്റ് പി.പി സുഗതന്‍ ഏറ്റുവാങ്ങി. എടക്കര പ്രവാസി കൂട്ടായ്മ രണ്ട് മെഷീനുകള്‍, മൂത്തേടം, പോത്തുകല്ല് പ്രവാസി കൂട്ടായ്മകള്‍, ഖത്തര്‍, ദുബായി പ്രവാസി സുഹൃത്തുക്കള്‍, നിലമ്പൂര്‍ മണ്ഡലം വ്യാപാരി വ്യവസായി ഏകോപനസമിതി എന്നിവര്‍ ഓരോ മെഷീനുകള്‍ക്കുള്ള തുകയും കൈമാറി. ഇതിനുപുറമെ എം.എല്‍.എ ഫണ്ടുപയോഗിച്ച് 7 മെഷീനുകള്‍കൂടി കേന്ദ്രത്തില്‍ സ്ഥാപിക്കും. ആശുപത്രിയുടെ മാതൃശിശു സംരക്ഷണ കേന്ദ്രത്തിന്റെ കെട്ടിടത്തിലാണ് കേന്ദ്രം പ്രവര്‍ത്തിക്കുക. ഇതിന് ആവശ്യമായ അടിസ്ഥാനസൗകര്യം ചുങ്കത്തറ കൈത്താങ്ങ് പ്രവാസി കൂട്ടായ്മ ഒരുക്കിവരികയാണ്. ബ്ലോക്ക് പഞ്ചായത്ത് പ്രസിഡന്റ് പി.പി സുഗതന്‍ അധ്യക്ഷനായി.
പഞ്ചായത്ത് പ്രസിഡന്റുമാരായ ഇ.എ സുകു, ആലീസ് അമ്പാട്ട്, സി.ടി രാധാമണി, കരുണാകരന്‍പിള്ള, കെ. സ്വപ്ന, പി.ടി ഉസ്മാന്‍, ബ്ലോക്ക് പഞ്ചായത്ത് വൈസ് പ്രസിഡന്റ് ജുവൈരിയ, പി.ടി ഉഷ, ഉഷ സന്തോഷ്, കെ.ടി കുഞ്ഞാന്‍, റഹ്മത്തുള്ള മൈലാടി,ബഷീര്‍ പുതുകൊള്ളി, യു.ഹൈദ്രു, പി.ടി അസറലി, വ്യാപാരി വ്യവസായി മണ്ഡലം പ്രസിഡന്റ് ഹക്കീം ചക്കാലത്ത്, തോട്ടക്കര ഷൗക്കത്ത്, അബ്ദുറഹ്മാന്‍ സംസാരിച്ചു.