മാള: വെള്ളാങ്കല്ലൂര്‍ ഗ്രാമപഞ്ചായത്തിലെ കടലായി പ്രദേശത്തെ ജനങ്ങള്‍ കുടിവെള്ളത്തിനായി നെട്ടോട്ടമോടുന്നു. വാട്ടര്‍ അതോരിറ്റിയുടെ വെള്ളം കൊടുക്കാതെ ബന്ധപ്പെട്ട അധികൃതര്‍ ജനങ്ങളെ ദുരിതത്തിലാക്കുന്നു. വാട്ടര്‍ അതോരിറ്റിയുടെ വെള്ളം മാത്രം ആശ്രയമായ പ്രദേശത്ത് കഴിഞ്ഞ 16 ദിവസത്തിലധികമായി വെള്ളമെത്തിയിട്ടില്ല.
നാല്‍പതോളം കുടുംബങ്ങളാണ് ഈ പ്രദേശത്ത് മാത്രം കുടിവെള്ളത്തിനായി അലയുന്നത്. 60 അടിയോളം വരെ ആഴമുള്ള കിണറുകളാണ് പ്രദേശത്തുള്ളത്. ഇവയെല്ലാം വറ്റി വരണ്ട് കിടക്കുകയാണ്. ഗ്രാമപഞ്ചായത്തിലെ തന്നെ ഏറ്റവും ഉയര്‍ന്ന സ്ഥലങ്ങളിലൊന്നാണിത്. കുടിക്കാനോ പാചകാവശ്യങ്ങള്‍ക്കോ പോലും ദിവസങ്ങളോളം കാത്തിരുന്ന് ഒടുവില്‍ ടാങ്കറുകളിലെത്തുന്ന ജലം മാത്രമാണ് ഇപ്പോള്‍ ഏകാശ്രയം.
വിവിധ സംഘടനകള്‍ വാഹനങ്ങളില്‍ ടാങ്കുകളില്‍ വെള്ളമെത്തിക്കുന്നുണ്ടെങ്കിലും ഒന്നിനും തികയാത്ത തരത്തിലാണ് ഓരോ കുടുംബങ്ങള്‍ക്കും വെള്ളം കിട്ടുന്നത്. വാട്ടര്‍ അതോറിറ്റിയുടെ വെള്ളമാണ് ഇവര്‍ക്ക് എത്തേണ്ടതെങ്കിലും അതോരിറ്റി ഇവരെ വട്ടം കറക്കുകയാണ്. വെള്ളമെത്താത്തതിനെക്കുറിച്ച് വാട്ടര്‍ അതോരിറ്റി ഉദ്യോഗസ്ഥരോട് ചോദിക്കുമ്പോള്‍ ജലനിധിക്കാരാണ് വെള്ളം തരേണ്ടതെന്നാണ് അവരില്‍ നിന്നുമുള്ള ഉത്തരം. വാട്ടര്‍ അതോരിറ്റിയുടെ കണക്ഷനു ള്ളവര്‍ക്കാണിപ്പോള്‍ വെള്ളം ലഭിക്കാതെ വന്നിരിക്കുന്നത്.
ഇവയിലൊന്നും തന്നെ വെള്ളം തീരെയെത്തുന്നില്ല. ജലനിധിയുടെ വണ്ണം കുറഞ്ഞ പൈപ്പുകള്‍ വാട്ടര്‍ അതോരിറ്റി വര്‍ഷങ്ങള്‍ക്ക് മുന്‍പിട്ട വണ്ണം കൂടിയ പൈപ്പുകളിലേക്ക് ബന്ധിപ്പിച്ചതിനാലാണ് ഉയര്‍ന്ന പ്രദേശങ്ങളില്‍  വെള്ളം ലഭിക്കാത്തതെന്നാണ് സൂചന. വെള്ളത്തിന്റെ മര്‍ദം കുറയുന്നതാണ് കാരണമായി പറയുന്നത്. നാട്ടുകാരുടെ നിരന്തര പരാതിക്കൊടുവില്‍ കഴിഞ്ഞ ദിവസം വാട്ടര്‍ അതോരിറ്റി അധികൃതര്‍ ഈ പ്രദേശത്ത് സന്ദര്‍ശനം നടത്തിയിരുന്നു.
രണ്ടു ദിവസത്തിനകം പരിഹാരം ഉണ്ടാക്കിയില്ലെങ്കില്‍ പ്രത്യക്ഷ സമരപരിപാടികളുമായി രംഗത്തിറങ്ങാനാണ് ജനങ്ങളുടെ തീരുമാനം. പ്രദേശത്തുകാര്‍ക്ക് ഉടനെ വെള്ളം എത്തിക്കാന്‍ വാട്ടര്‍ അതോരിറ്റി തയ്യാറായില്ലെങ്കില്‍ ഉദ്യോഗസ്ഥരെ ഉപരോധിക്കുന്നതടക്കമുള്ള സമര പരിപാടികളുമായി രംഗത്ത് ഇറങ്ങുമെന്ന് നാട്ടുകാര്‍ മുന്നറിയിപ്പ് നല്‍കി.