ന്യൂഡല്‍ഹി: താന്‍ ദക്ഷിണേന്ത്യയില്‍ നിന്ന് തെരഞ്ഞടുപ്പില്‍ മല്‍സരിക്കണമെന്ന ആവശ്യം ന്യായമാണെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി.

ആവശ്യം ഉയരാനുള്ള കാരണം മോദിയാണ്. ഉത്തരേന്ത്യക്കും ദക്ഷിണേന്ത്യക്കും ഇടയില്‍ സ്‌നേഹത്തിന്റെയും സദ്ഭാവനയുടെയും ബന്ധമാണുണ്ടായിരുന്നത്. കുറച്ചു വര്‍ഷങ്ങളായി കേരളം, തമിഴ്‌നാട് തുടങ്ങിയ സംസ്ഥാനങ്ങളില്‍ ബി.ജെ.പി ധ്രുവീകരണ ശ്രമങ്ങളാണ് നടത്തുന്നത്. ഭാഷയും സംസ്‌കാരവും അപകടത്തിലാണെന്ന് അവിടുത്തെ ജനങ്ങള്‍ കരുതുന്നു. ഈയൊരു പശ്ചാത്തലത്തിലാണ് താനവിടെ മല്‍സരിക്കണമെന്ന ആവശ്യം ദക്ഷിണേന്ത്യയിലെ ജനങ്ങള്‍ ഉയര്‍ത്തുന്നത്. അത് തികച്ചും ന്യായമാണ്.ഇക്കാര്യത്തില്‍ ഇതുവരെ തീരുമാനമെടുത്തിട്ടില്ലെന്നും രാഹുല്‍ പറഞ്ഞു.
വയനാട്ടില്‍ നിന്നോ കര്‍ണാടകയിലെ ഏതെങ്കിലും മണ്ഡലത്തില്‍ നിന്നോ മത്സരിക്കുമെന്ന അഭ്യൂഹങ്ങള്‍ക്കിടെ ഹിന്ദി ദിനപത്രം അമര്‍ ഉജാലയ്ക്ക് നല്‍കിയ അഭിമുഖത്തിലാണ് രാഹുല്‍ മനസ് തുറന്നത്. ഇന്ദിരയും സോണിയയുമൊക്കെ ദക്ഷിണേന്ത്യയില്‍ നിന്ന് മല്‍സരിച്ചപ്പോള്‍ പാര്‍ട്ടി ജയിച്ചു.

അത്തരം രാഷ്ട്രീയ മായാവിദ്യയാണോ ഇതെന്ന ചോദ്യത്തിന് താനൊരു അന്ധവിശ്വാസിയല്ലെന്നും മായാവിദ്യകളില്‍ വിശ്വസിക്കുന്നില്ലെന്നും രാഹുല്‍ പറഞ്ഞു. അമേത്തിയില്‍ വിജയിക്കുമോ എന്നതില്‍ സന്ദേഹമുണ്ടോ എന്ന ചോദ്യത്തിന് ഒരു സന്ദേഹവുമില്ലെന്നും അമേത്തിയില്‍ തന്നെ മല്‍സരിക്കുമെന്നും അദ്ദേഹം വ്യക്തമാക്കി.