മാനന്തവാടി: ഓട്ടോ ടാക്‌സി നിയന്ത്രണംവിട്ട് മറിഞ്ഞ് ഡ്രൈവര്‍ ഉള്‍പ്പെടെ രണ്ടുപേര്‍ മരിച്ചു. അപകടത്തില്‍ അഞ്ചു പേര്‍ക്ക് പരുക്കേറ്റു. ഇന്നലെ രാവിലെ 7.30തോടെ പാല്‍ചുരം ആശ്രമം വളവില്‍ ആണ് അപകടം. വള്ളിയൂര്‍ക്കാവ് ക്ഷേത്രോത്സവംകഴിഞ്ഞ് മടങ്ങിയവരാണ് അപകടത്തില്‍പെട്ടത്. ഓട്ടോ ഡ്രൈവര്‍ ബാവലി ഷാണമംഗലം പാലാട്ടുചാലില്‍ രമേശ് ബാബു എന്ന കണ്ണന്‍ (39), യാത്രക്കാരിയായ കണ്ണൂര്‍ ആറളം ഫാമിലെ ബ്ലോക്ക് നമ്പര്‍ 316 ലെ ശാന്ത (42) എന്നിവരാണ് മരിച്ചത്. മാനന്തവാടി വള്ളിയൂര്‍ക്കാവ് ക്ഷേത്രത്തിലെ ഉത്സവം കഴിഞ്ഞ് മടങ്ങുന്നതിനിടെ നിയന്ത്രണം നഷ്ടപ്പെട്ട ഓട്ടോറിക്ഷ റോഡരികിലേക്ക് മറിയുകയായിരുന്നുവെന്ന് പരിസരവാസികള്‍ പറഞ്ഞു. ശാന്തയുടെ ഭര്‍ത്താവ് രാജു (45), ആറളം പ്രദേശവാസികളായ സജി(31), സീത(29), അപര്‍ണ (14), അജിത്ത് (10) എന്നിവരെ പരുക്കുകളോടെ ജില്ലാ ആശുപത്രിയില്‍ പ്രവേശിപ്പിച്ചു. ആരുടെയും നില ഗുരുതരമല്ല. മൃതദേഹങ്ങള്‍ പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് വിട്ടു നല്‍കി. ദീപയാണ് മരിച്ച രമേശിന്റെ ഭാര്യ. നിരഞ്ജന, നിവേദിത, നിഹാരിത എന്നിവര്‍ മക്കളാണ്.